Körfubolti

Vilja fá meiri pening frá Garðabæ fyrir góðan árangur

Benedikt Bóas Hinriksson skrifar
Meistaraflokkur Álftaness í körfubolta varð Íslands- og deildarmeistari í 2. deild en liðið tapaði einungis tveimur leikjum á tímabilinu.
Meistaraflokkur Álftaness í körfubolta varð Íslands- og deildarmeistari í 2. deild en liðið tapaði einungis tveimur leikjum á tímabilinu. Fréttablaðið/Anton

Bæjarráði Garðabæjar barst bréf frá körfuboltadeild Álftaness þar sem beðið er um að bærinn borgi 70 prósent af komandi útgjöldum. Álftanes fór upp í 1. deild og styrkti bærinn deildina um milljón. Með auknum árangri kemur aukinn kostnaður og biður deildin nú bæinn um 4,4 milljónir af 6,3 milljóna kostnaðaráætlun. Það sem upp á vantar ætlar deildin að safna sjálf.

Meistaraflokkur UMFÁ karla í körfubolta varð Íslands- og deildarmeistari í 2. deild en liðið tapaði aðeins tveimur leikjum á tímabilinu. Liðið tryggði sér þátttökurétt í 1. deild að ári en fyrir aðeins tveimur árum spilaði liðið í 3. deild. Samkvæmt bréfinu hefur félagið sýnt ráðdeild og tekist með litlum rekstrarkostnaði að halda úti öflugu starfi með miklum árangri. Er bent á að verulega munaði um framlag Garðabæjar til körfuknattleiksdeildarinnar sem hljóðaði upp á eina milljón króna þegar liðið komst upp í 2. deild, en fram að því hafði liðið ekki fengið fjárhagsaðstoð frá bænum heldur aðstöðu.

Stjórn körfuknattleiksdeildarinnar hefur unnið fjárhagsáætlun fyrir komandi ár en bent er á það í bréfinu til bæjarins að leikir í 1. deild eru mun fleiri, æfingar og þjálfun umfangsmeiri, dómarakostnaður hærri og meiri kröfur til leikmanna. Fer stjórnin fram á viðauka við núgildandi samning þar sem framlag til körfunnar mun aukast.

Deildin telur það vera körfuboltanum í Garðabæ til mikilla heilla að öflugt lið spili í 1. deild. Samstarfsfletir aukist og möguleikar á þróun fyrir körfubolta í bænum. Þannig auki það líkur á að góður árangur náist ef bæði lið Álftaness og Stjörnunnar haldi úti metnaðarfullu starfi í 1. deild og Domino’s-deildinni. Bæjarráðið vísaði bréfinu til umfjöllunar aðalstjórnar Ungmennafélags Álftaness og íþrótta- og tómstundaráðs sem og til nánari skoðunar við afgreiðslu fjárhagsáætlunar fyrir árið 2020.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.