Innlent

Vetur konungur kannski ekki alveg búinn að sleppa takinu

Sunna Kristín Hilmarsdóttir skrifar
Gangi spárnar eftir verður ekkert stuttbuxnaveður í næstu viku heldur er vissara með úlpuna og húfuna á vísum stað.
Gangi spárnar eftir verður ekkert stuttbuxnaveður í næstu viku heldur er vissara með úlpuna og húfuna á vísum stað. vísir/Vilhelm

Um miðja næstu viku gera spár Veðurstofu Íslands ráð fyrir norðanhreti í veðrinu. Þetta kemur fram í hugleiðingum veðurfræðings á vef Veðurstofunnar en þar segir að töluverður munur sé á því hversu mikið muni kólna samkvæmt helstu reiknistofum í veðurfræði.

Þó er ljóst að það mun kólna talsvert frá því sem nú er eða eins og segir í hugleiðingunum:

„[…] þannig að kannski er vetur konungur ekki alveg búinn að sleppa takinu enda algengt að það leggi í norðan kulda í mái og komandi maímánuður virðist engin undantekning á því.“

Hvað varðar veðurhorfur á landinu í dag og næstu daga verður svipað veðurlag verði áfram og var í gærkvöldi og nótt. Muni fremur litlir úrkomubakkar koma inn á landið og með þeim minniháttar skúrir.

„Yfirleitt þurrt fyrir norðan og sökum þess hve austlægur vindurinn er er Austfjarðaþokan aldrei langt undan í þeim landshluta. Heldur lægri hitatölur en voru í gær en engu að síður vel viðunandi.“

Veðurhorfur á landinu:

Austlæg átt, 5-15 m/s, hvassast syðst og um tíma einnig á Vestfjörðum. Skýjað og skúrir sunnan til en rigning með köflum um tíma síðdegis og fram á kvöld. Lengst af þurrt fyrir norðan en líkur á vætu þar um tíma seinnipartinn. Þokusúld á köflum á Austfjörðum. Svipað veður á morgun en fer að rigna A-lands annað kvöld. Hiti víða 8 til 15 stig, en svalara við A-ströndina.

Á laugardag:
Austlæg átt, 8-15 m/s, hvassast syðst. Dálítil rigning á víð og dreif og hiti 6 til 14 stig, hlýjast á V-landi.

Á sunnudag:
Suðaustlæg átt, 3-10 m/s og rigning á köflum, en þurrt að mestu fyrir norðan. Hvassari og samfelld rigning SV-lands um kvöldið. Hiti 6 til 13 stig, svalast á Austfjörðum.

Á mánudag og þriðjudag:
Austlægar áttir og dálítil væta öðru hvoru, einkum S- og A-lands, en áfram milt veður.

Á miðvikudag:
Hæg austlæg átt, bjart með köflum og milt veður að deginum, en útlit fyrir norðanátt um kvöldið með skúrum eða slydduéljum fyrir norðan og kólnandi veðri.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.