Viðskipti innlent

Áhrifavaldar skattlagðir eins og aðrir

Stefán Ó. Jónsson skrifar
Hafi þessi áhrifavaldur fengið þessa máltíð gefins gegn því að birta mynd af henni á samfélagsmiðlum eru allar líkur á því að hann þurfi að gefa hana upp til skatts.
Hafi þessi áhrifavaldur fengið þessa máltíð gefins gegn því að birta mynd af henni á samfélagsmiðlum eru allar líkur á því að hann þurfi að gefa hana upp til skatts. Getty/Westend61
Þrátt fyrir að ýmis „skattaleg álitaefni“ vakni í starfsemi hinna svokölluðu áhrifavalda ættu þeir að hafa í huga þá meginreglu að allar tekjur séu skattskyldar, hvort sem þær eru í formi peninga eða annars konar verðmæta. Þegar áhrifavaldar fá t.a.m. greitt fyrir vinnu sína í vörum eða annarri þjónustu skulu þeir gefa hana upp til skatts.

Þetta er meðal þess sem kemur fram í útlistun á vef ríkisskattstjóra, þar sem tekið hefur verið saman hvernig skattlagningu er háttað í starfsemi áhrifavalda.

Þar segir til að mynda að almennt sé gengið út frá því að „áhrifavaldar séu þeir sem hafa stóran hóp fylgjenda og geta haft áhrif á kauphegðun þeirra með auglýsingum og umfjöllun um vöru eða þjónustu.“ Meira þurfi þó að koma til en stór fylgjendahópur þegar ákvarðað er hvaða skattareglur eigi við starfsemi áhrifavaldanna.

Sjá einnig: Þetta eru reglurnar sem áhrifavaldar þurfa að fylgja

„Meðal þess sem líta ber til er hvort áhrifavaldar teljist hafa atvinnurekstur með höndum og hvernig endurgjaldi fyrir þjónustu þeirra er háttað. Athuga þarf að þótt viðkomandi teljist ekki vera í atvinnurekstri þá eru tekjurnar almennt skattskyldar. Aðgreining þess hvort viðkomandi teljist vera í atvinnurekstri eða ekki ræður hins vegar úrslitum um það hvernig skattlagningu er háttað,“ segir á vef ríkisskattstjóra.

Þrátt fyrir að endurgjald fyrir markaðssetningu á samfélagsmiðlum sé af ýmsum toga er þó meginreglan í þessum efnum einföld: Allar greiðslur; sama hvort þær eru í peningum, vörum eða öðrum hlunnindum, eru skattskyldar.

Þannig þurfa áhrifavaldar sem fá greitt í peningum að telja fram upphæðina, hvort sem hennar er aflað í atvinnurekstri eða utan rekstrar. Það sama á við þegar greitt er fyrir vinnu þeirra með öðrum aðferðum. „Greiðslan er skattskyld og leggja ber markaðsverð/gangverð til grundvallar við ákvörðun tekjufjárhæðarinnar. Hér er átt við endurgjald í formi vöru eða þjónustu eða öðru formi s.s. hlunninda. Dæmi um hlunnindi eru m.a. afnot af bifreið eða húsnæði, ferðalög og hótelgisting.“

Í útlistun ríkisskattstjóra er þó tekið fram að ýmis „frávik og undanþágur frá meginreglunni“ eigi við í ákveðnum tilfellum. Nánari upplýsingar um frávikin, sem og aðrar reglur er lúta að skattlagningunni, má nálgast á vef ríkisskattstjóra.


Tengdar fréttir

Neytendur sagðir vantreysta áhrifavöldum

Þrátt fyrir að rúmur helmingur ungra neytenda láti auglýsingar á samfélagsmiðlum hafa áhrif á kauphegðun sína segist mikill meirihluti aðspurðra vantreysta svokölluðum áhrifavöldum.

Ekki slegið af kröfum fyrir áhrifavalda

Neytendastofa hefur nýverið úrskurðað í nokkrum málum þar sem svokallaðir áhrifavaldar og fyrirtæki eru áminnt fyrir duldar auglýsingar. Lektor í lögfræði segir reglur um þetta skýrar og telur að málum af þessu tagi muni fjölga á næstunni.






Fleiri fréttir

Sjá meira


×