Fólk á bara að fylgja umferðarreglunum

Tveir feður barna í Vesturbæjarskóla segjast ekki treysta ökumönnum á Hringbraut á morgnana. Þeir fylgja börnum sínum allajafna í skólann. Gangbrautarvörður segir hafa verið sjáanlegan mun á akstri á Hringbraut í morgun þegar hann stóð vaktina daginn eftir slys en aðra morgna.

Slys á gönguljósum í gærmorgun á Hringbraut þar sem Meistaravellir ganga til vesturs leiddu til breytinga samdægurs. Boðað var til íbúafundar með fulltrúum Vegagerðarinnar, Reykjavíkurborgar og lögreglu í gær sem til stendur að halda í næstu viku. Þá var fjármagni veitt til Vesturbæjarskóla til að standa kostnað af gangbrautarvörslu frá 8 til 8:30 á morgnana.

Þegar blaðamann bar að garði klukkan átta í morgun var gangbrautarvörður mættur á gönguljósin. Þar var á ferðinni Cyrus Ali Khashabi sem starfar sem stuðningsfulltrúi við Vesturbæjarskóla. Einnig var mættur fulltrúi lögreglu á mótorhjóli sem tjáði blaðamanni að ef færi gæfist yrði fulltrúi lögreglu þar fyrstu tvo til þrjá morgnana til að vekja athygli á aðstæðum við gönguljósin.

Á gatnamótum Hringbrautar og Framnesvegar í 200 metra fjarlægð var Jóhannes Tryggvason, íbúi við Framnesveg vestan Hringbrautar, og stóð vaktina við gangbrautarvörslu í sjálfboðavinnu. Hann tjáði blaðamanni að þannig yrði það þar til brugðist yrði við af hálfu skólayfirvalda eða Reykjavíkurborgar.

Eiginkona hans, tengdafaðir og fleiri foreldrar myndu taka þátt.

Þetta er bara svakalegt

„Mér líst mjög vel á þetta ef þetta endist. Ég hef verið að bíða eftir þessu eins og allir hinir í hverfinu. Ég labba með börnin á hverjum degi. Maður treystir aldrei bílunum eða neinu. Þetta er bara svakalegt,“ segir Ásgeir Líndal sem var á leiðinni í skólann með börnin sín yfir Hringbraut við Meistaravelli í morgun.

Hann segist oft taka eftir því að ökumenn bruni yfir á rauðu ljósi. Lausnin sé augljós.

„Fólk á bara að fylgja umferðarreglunum. Það er bara einfalt. Ég ætla að halda áfram að labba með börnunum í skólann.“

Bjarni Baldursson var á hjólinu með börnum sínum á sama stað.

„Við förum stundum keyrnadi en yfirleitt fylgi ég þeim. Ég er búinn að vera með krakka í skólanum í tíu ár. Við segjum alltaf við þau að það má fara yfir þegar það er grænt ljós en það er ekki öruggt. Það er eiginlega undantekning ef enginn fer yfir á rauðu ljósi til að ná yfir,“ segir Bjarni.

Brunaði yfir á rauðu ljósi

Jóhannes Tryggvason, íbúi við Framnesveg, stóð vaktina við gatnamót Hringbrautar og Framnesvegar. Hann segir ábendingar til skólayfirvalda undanfarin ár engu hafa skilað. Gatnamótin séu enn hættulegri en á gönguljósunum við Meistaravelli enda séu bílar líka að beygja frá Framnesvegi inn á Hringbrautina.

Cyrus Ali Khashabi, stuðningsfulltrúi við Vesturbæjarskóla, sagði morguninn hafa gengið vel á gönguljósunum þar sem hann sinnti gangbrautarvörslunni. Hann þekkir flest börnin frá störfum sínum í skólanum. 

Lögreglumaðurinn sem fylgdist með gangi mála við gönguljósin sagðist telja að um 40 börn hefðu farið yfir á gönguljósunum í morgun áleiðis í Vesturbæjarskóla. Hann hefði ekki tekið eftir mörgum á leiðinni í hina áttina í Hagaskóla sem 13-15 ára börn í Vesturbænum sækja. 

Upp úr klukkan 8:35, þegar gangbrautarvörðurinn var farinn til vinnu í Vesturbæjarskóla og lögreglumaðurinn horfinn á braut, mætti ungur drengur á svæðið og hugðist fara yfir götuna. Hann ýtti á takkann og beið eftir grænu ljósi. Á því augnabliki sem umferðarljósið varð rautt ók ökumaður á stórum jeppa yfir eins og sjá má á mynd inni að neðan.

Að ofan má sjá frá heimsókn fréttamanns að gatnamótunum í morgun.