Tveir tímar kostuðu nema hátt í milljón

Tveir meintir prufutímar reyndust nemanda Ferðamálaskóla Íslands dýrir. Skólastjórinn segir ekki hægt að prufa og alla gera sér grein fyrir hvað felist í umsókn.

Nemandi við Ferðamálaskóla Íslands hefur verið dæmdur til að greiða skólanum full skólagjöld, 440 þúsund krónur, að frádregnu 50 þúsund króna skrásetningargjaldi, vegna leiðsögunáms.

Umræddur nemandi taldi að hann hefði fengið loforð um prufutíma og hætti námi eftir tvær kennslustundir. Málskostnaður nam 372 þúsund krónum. Tímarnir tveir kostuðu því rúm 800 þúsund.

Þetta er þriðja málið tengt skólagjöldum við skólann sem ratar fyrir dómstóla en í öllum tilfellum hefur verið fallist á kröfur skólans. Í þessu máli taldi nemandinn að munnlegur samningur hefði komist á um að hann fengi að sitja prufutíma. Þá taldi hann einnig að ekkert í umsóknarskjali skólans bæri það með sér að hann hefði skuldbundið sig til að greiða gjaldið.

Í niðurstöðu dómsins var báðum málsástæðum hafnað en sagt að sú staðreynd að þrjú dómsmál hefðu farið fyrir dóm vegna skólagjalda ætti að vera „nægileg hvatning fyrir [skólann] til að íhuga hvort ekki megi bæta form umsóknar“.

„Fólk gerir sér alveg grein fyrir því þegar það sækir um að það þurfi að greiða fyrir námsvistina. Í þessu máli er þetta svolítið eins og ef þú ferð á veitingastað, borðar forrétt, hluta af aðalréttinum og segist svo ekki ætla að borga,“ segir Friðjón Sæmundsson, skólastjóri Ferðamálaskólans.

Dæmi eru um að fólk sem lokið hefur leiðsögunámi við skólann hafi sótt um aðild að Leiðsögn, stéttarfélagi leiðsögumanna, og verið hafnað. Ástæðan sé sú að skólinn kennir ekki samkvæmt námskrá menntamálaráðuneytisins. Í nýlegri skýrslu frá starfshópi á vegum félagsins segir að „útskrifaðir nemendur skólans uppfylli prýðilega skilgreiningu á starfi fararstjóra“ en teljist ekki leiðsögumenn.

„Stjórnendur félagsins hafa hatast út í þetta nám og skólann og eru sjálfum sér til stórfelldrar skammar. Leiðsögn er í raun stéttarfélag og það geta allir sem vilja verið í því stéttarfélagi,“ segir Friðjón.

Indriði H. Þorláksson, formaður Leiðsagnar, vildi ekki ræða málefni skólans þegar falast var eftir því.