Sjáðu þjóðsöngsklúður KSÍ

Íslenska kvennalandsliðið í knattspyrnu tapaði fyrir Þjóðverjum í undankeppni HM 2019 í knattspyrnu á Laugardalsvelli með tveimur mörkum gegn engu á laugardaginn. Þrátt fyrir úrslitin eygir Ísland enn von um að komast á HM í Frakklandi á næsta ári.

Umgjörðin um leikinn var með besta móti og var sett áhorfendamet á kvennalandsleik á Laugardalsvelli en 9636 horfðu á leikinn úr stúkunni og uppselt var á leikinn.

Þrátt fyrir góða umgjörð vakti eitt atvik fyrir leik athygli. Eftir að spilun þjóðsöngs Þýskalands lauk var óvenju löng bið eftir að þjóðsöngur Íslands, Lofsöngur Matthíasar Jochumssonar, hæfist. Í framhaldinu heyrðust hljóð sem vallargestir og sjónvarpsáhorfendur þekkja úr Windows stýrikerfi Microsoft. Leikmenn og áhorfendur brostu ýmist eða skelltu upp úr.

Allt í einu heyrðist svo í laginu sem var þá löngu hafið. Aftur heyrðist bjölluhljóð Microsoft og var uppákoman hin vandræðalegasta.

Heyra mátti mistökin í útsendingu Stöðvar 2 Sport eins og sjá má hér að neðan.