Fyrrverandi samkennarar segja aðför gerða að skólastjóra

„Okkur fyrrverandi starfsmönnum Breiðholtsskóla er misboðið að lesa í blöðum grimmar árásir á gott skólastarf á fyrrverandi vinnustað okkar,“ segja þrjár konur sem allar eru fyrrverandi starfsmenn við Breiðholtsskóla.

Í Fréttablaðinu 29. janúar gagnrýndi Silja Andradóttir, móðir stúlku sem hætti í 9. bekk í Breiðholtsskóla í haust, óstöðugleika í skólastarfinu. Þótt kennararnir séu frábærir þá stoppi þeir stutt við í starfi. „Þá hlýtur eitthvað að vera að hjá stjórnendum skólans,“ sagði Silja. Skólastjórinn hefur fengið á sig harða gagnrýni.

Þær Gyða Kristmannsdóttir, Siggerður Ólöf Sigurðardóttir og Ingibjörg María Aadnegard segjast vilja koma Breiðholtsskóla og Jónínu Ágústsdóttur skólastjóra til varnar. Gyða var deildarstjóri og aðstoðarskólastjóri í afleysingum, Siggerður kenndi á miðstigi og Ingibjörg var sérkennari í Breiðholtsskóla.

Sjá einnig: Krakkar og kennarar streyma úr Breiðholtsskóla vegna óróa

„Við hörmum aðför að skólastjóra, sú aðför hefur áhrif á skólabraginn. Jákvæður skólabragur skiptir öllu máli,“ segja Gyða, Siggerður og Ingibjörg í sameiginlegri yfirlýsingu til Fréttablaðsins.

„Þegar stjórnendur og kennarar upplifa slíkt varnarleysi og að þeim er vegið á grimman hátt í dagblöðum landsmanna, stundum með rökleysu, jafnvel röngum ályktunum, bogna flestir. Til að bjarga eigin heilsu og annarra þá er því miður staðreynd að margir hverfa til annarra starfa. Það er meðal annars ástæða fyrir brottför okkar úr Breiðholtsskóla,“ segja konurnar þrjár.

Þær undirstrika að það sem byggi gott skólasamfélag sé nemendur, kennarar, foreldrar og annað starfsfólk með samvinnu, traust og gagnkvæma virðingu að leiðarljósi. Nærsamfélagið sé einnig hluti af samstarfinu. Byggðin í neðra Breiðholtinu sé eins og lítill kjarni sem umvefji skólasamfélagið.

Ekki skólastjóri einn sem veldur

„Í þessu skólasamfélagi mætti þó ríkja meiri samstarfsvilji og eining, meðan svo er ekki verða hlutirnir snúnir. Er ekki tímabært að það fólk sem rakkað hefur niður og skaðað þannig skólastarfið líti í eigin barm? Hætti nú og geri sér grein fyrir að það er ekki skólastjóri einn sem byggir skólastarfið. Í tíð núverandi skólastjóra hefur verið lyft grettistaki í að bæta aðbúnað nemenda og kennara,“ segja Gyða, Siggerður og Ingibjörg.

„Er ekki tímabært að stoppa og veita kennurum og stjórnendum vinnufrið, þetta eru góðir fagmenn og hafa verið að gera góða hluti,“ segja þær. Þeirra upplifun sé sú að í Breiðholtsskóla sé unnið að faglegum metnaði barnanna, þar séu góðir námsmenn og glæsileg ungmenni sem njóti fjölbreytts skólastarfs.

„Talið saman af virðingu og metnaði fyrir hönd skólans og um skólann því það á skólinn sannarlega skilið, nemendur og allt það starfsfólk sem þar starfar. Kveikjum því á kerti fremur en að kvarta yfir myrkrinu.“