Þrír ákærðir fyrir kókaínsmygl sem teygir anga sína til óþekkts manns í Mexíkó

Þrír hafa verið ákærðir fyrir að smygla 2,8 kílóum af kókaíni til landsins sem falið var í ungbarnavörum og súrefnisvél. 

Mennirnir þrír eru af erlendum uppruna en allir búsettir hér á landi. Sá elsti þeirra, fæddur árið 1972, er grunaður um að fjármagna og standa að baki smyglinu á báðum pökkum ásamt óþekktum manni í Mexíkó. Hinir tveir eru grunaðir um að taka við sendingunum.

Samkvæmt ákærunni var kókaínið 73 prósent en frá Mexíkó fóru sendingarnar annarsvegar til Dresden í Þýskalandi laugardaginn 28. apríl síðastliðinn og til Cincinnati í Bandaríkjunum fimmtudaginn 3. maí síðastliðinn.

Fíkniefnin sem send voru til Dresden voru falin í botnspýtum plastgrindar sem skrúfuð var utan um pappakassa sem innihélt ungbarnavörum. Var um að ræða DHL hraðsendingu en efnin höfðu verið fjarlægð úr pakkanum í samráði við lögreglu á Íslandi og hlustunarbúnaði komið fyrir og sendingunni fylgt eftir. 

Lögreglan á Íslandi sótti hins vegar pakkann í Cincinnati í júní síðastliðnum og koma honum áfram til Íslands.

Einn mannann tók við sendingunni á heimili sínu í maí og fór með hana á verkstæði í Kópavogi miðvikudaginn 9. maí þar sem skipuleggjandinn tók við henni. Þriðji maðurinn tók á móti pakkanum á heimili sínu og kom honum til þess sem er grunaður um að skipuleggja og fjármagna smyglið.

Gerð var húsleit á heimili hins meinta höfuðpaurs málsins en þar fundust 193 stykki af anabólískum sterum sem hann er grunaður um að hafa flutt ólöglega hingað til lands eða þá að hafa tekið við án þess að geta dulist að þau væru ólöglega innflutt hingað til lands. Fann lögreglan lyfin í ísskáp á heimili mannsins.