Í annað sinn sem húsnæði Glugga- og hurðasmiðju SB brennur til kaldra kola
Glugga- og hurðasmiðja Sigurðar Bjarnasonar sem stóð á Hvaleyrarbraut í Hafnarfirði er gjörónýt eftir að eldur kviknaði í húsnæðinu á ellefta tímanum í gærkvöld.
Þetta er í annað sinn sem húsnæði Glugga-og hurðasmiðju SB brennur til kaldra kola því árið 1996 varð stórbruni í Glugga-og hurðasmiðjunni sem þá var til húsa að Dalshrauni 17. Fyrirtækið opnaði síðan á nýjum stað að Hvaleyrarbraut ári síðar.
Tuga milljóna króna tjón varð í brunanum að því er fram kemur í frétt Morgunblaðsins frá árinu 1996. Húsið var mannlaus en eignatjónið, sem fyrr segir, gífurlegt.
Búið er að rífa efri hæð hússins að Hvaleyrarbrautinni til að forða foktjóni og vernda nærliggjandi hús en veðuraðstæður hafa verið afar óhagstæðar. Hvassviðri torveldaði slökkviliðsmönnum verkið en allt tiltækt slökkvilið á höfuðborgarsvæðinu var kallað út vegna eldsvoðans.
Þegar fréttastofa náði tali af Rúnari Helgasyni varðstjóra hjá Slökkviliðinu á höfuðborgarsvæðinu klukkan sjö í morgun logaði enn í litlu rými á vélaverkstæðinu sem er á neðri hæð hússins og þá liggur fyrir að slökkvistarf standi yfir fram eftir degi.
Tengdar fréttir
Eigandi bílaverkstæðis á neðri hæð hússins segir skelfilegt að horfa upp á brunann
Segir gaskúta, bensín á bílum og olíefni á verkstæðinu.
Þurftu að sækja vatn til Garðabæjar vegna slökkvistarfs í Hafnarfirði
Strax í upphaf var ljóst að um mikinn bruna var að ræða og þurfti ansi mikið magn af vatni til að ráða niðurlögum eldsins.
Stórbruni í Hafnarfirði: Búið að rífa efri hæð hússins
Allt tiltækt slökkvilið á vettvangi.
Aðstæður gríðarlega erfiðar og mikið um sprengingar
Sigurður Lárus Fossberg, varðstjóri slökkviliðsins á höfuðborgarsvæðinu segir aðstæður við stórbrunann í Hafnarfirði hafa verið gríðarlega erfiðar og miklar sprengingar á svæðinu þegar slökkvilið bar að garði.
