Árni Már heldur sýninguna Öldur aldanna

Listamaðurinn Árni Már Erlingsson fer af stað með sýningu sína Öldur aldanna  á morgun laugardaginn 10. nóvember kl. 16:00 í Listamönnum Skúlagötu 32.

Tónlistarmaðurinn Högni Egilsson mun mæta og taka nokkur vel valin lög á opnuninni. Sýningin stendur til 29. nóvember og er opið mánudaga- til laugardags frá 9:00-18:00.

Sjór er viðfangsefni sem hefur verið Árna hugleikið undanfarin ár, ekki eingöngu í verkum hans heldur hefur hann verið iðinn við sjóböð og sund. Meðal verka á sýningunni eru málverk, prentverk, verkfæri sem Árni hefur sett saman og sýnir sem skúlptúra. Ídýfingarkassi sem notaður er við eftirvinnslu á silkiþrykktum prentum og kökukefli útbúið sem aðferð fyrir dúkristur.

Árni er einn af stofnendum Gallery Ports sem opnað var í lok mars 2016 og var einnig einn af stofnendum Festisvalls, kollektífs sem teygði anga sína til Þýskalands og Hollands. Þetta er önnur sýning Árna á árinu en sú fyrri, Öldugrænn var sett upp í Bismút í byrjun árs.