Þetta kemur fram í pistli eftir Jón Steinar sem Vísir birtir. Grein sem hann birti í nýliðinni viku vakti töluverð viðbrögð en þar lýsti hann því að í þeim hópi hafi hann meðal annars verið kallaður „viðbjóður“, „ógeð og „illfygliskarlagerpi sem þurfi að fokka sér“ og þar spurt hvort ekki sé vert að skála í kampavíni þá er hann deyr.
Þetta telur Jón Steinar tengjast því að hann er lögmaður Kristins Sigurjónssonar lektors við Háskólann í Reykjavík, en hann var rekinn þaðan vegna ummæla á Facebookhópi sem heitir Karlmennskan. Þar veltir hann því fyrir sér, hvort hugsanlega sé vert aðskilja konur og karla á vinnustöðum. Kristinn sagði eitthvað á þá leið að konur væru að troða sér í öll störf og eyðileggja vinnustaði.
Segist hafa ákveðið að „fyrirgefa þeim sóðaskapinn“
Jón Steinar fer yfir málið eins og það horfir við honum nú. Hann segist til að mynda hafa verið lögmaður Róberts Downey á sínum tíma þegar sá síðarnefndi vildi fá lögmannsréttindi sín á nýjan leik eftir að hafa verið dæmdur fyrir að misnota unglingsstúlkur.Málið vakti upp mikla reiði í samfélaginu og ofbauð mörgum þegar Jón Steinar sagði að hollast væri öllum ef þolendur fyrirgæfu skjólstæðingi sínum. Aðstandendur hópsins „Karlar gera merkilega hluti“ hafa bent á að ummælin um Jón Steinar tengist einkum því máli. Tara Margrét Vilhjálmsdóttir er þeirra á meðal og birti grein þess efnis á Facebook-síðu sinni í gær, líkt og Vísir greindi frá.
Í yfirlýsingu sem stjórnendur Facebook-hópsins, Sóley Tómasdóttir, Hildur Lilliendahl Viggósdóttir og Sæunn Ingibjörg Marinósdóttir, sendu á fjölmiðla í gær bentu þær Jóni Steinari á að kannski ætti hann að „prófa sitt eigið meðal og fyrirgefa konunum sem tala um hann á internetinu frekar en að hringja í þær og skrifa um þær greinar í blöðin.“
Í grein sinni segir Jón Steinar að þetta sé hann tilbúinn til þess að gera.
„Svo biðja þær mig um að fyrirgefa sér það sem þær hafi gert á hluta minn. Það hljóti ég að vilja gera þar sem ég hafi mælt með þessari aðferð þegar mál Róberts var til umræðu. Með þessu og heitinu um að gæta orða sinna í framtíðinni hafa þær algerlega snúið við blaðinu. Ég hlýt að fagna þessum sinnaskiptum. Ég hef því ákveðið að fyrirgefa þeim sóðaskapinn gagnvart mér sem birst hefur að undanförnu. Þetta geri ég ekki síst vegna þess að ég vil sýna börnum mínum hvernig veldi feðranna getur verið hugljúft og fordæmisgefandi,“ segir Jón Steinar í pistlinum.
Býðst til að verja Hildi verði hún rekin
Jón Steinar segist aldrei hafa fengið eins mikil viðbrögð við neinu og grein sinni í vikunni og segir hann frá einu samtali sem hann hann hafi átt í því sambandi. Í hann hafi hringt kona sem vildi tala um Hildi Lilliendahl við hann.„Sagði hún alkunnugt, að þú værir bara áskrifandi launa hjá Reykjavíkurborg án þess að gera neitt í vinnunni annað en að hanga í tölvunni þinni til að iðka femínisma. Ég sussaði á konuna og sagði henni að nota ekki svona talsmáta. Og við þig Hildur, segi ég bara að verðir þú rekin úr vinnunni, eins og viðmælandi minn taldi borginni skylt að gera, getur þú leitað til mín. Ég fer með fleiri mál þar sem starfsmönnum hefur verið vikið úr vinnu fyrir að tjá skoðanir utan atvinnunnar,“ skrifar Jón Steinar meðal annars í pistli sínum sem má lesa hér.
