De Bruyne gæti spilað gegn Liverpool

Kevin de Bruyne gæti snúið aftur í lið Manchester City í stórleiknum gegn Liverpool á sunnudaginn. Belginn hefur ekki spilað leik í nærri tvo mánuði.

Pep Guardiola sat fyrir svörum blaðamanna í dag og var hann spurður hvort de Bruyne væri tilbúinn.

„Við sjáum til á laugardaginn,“ svaraði Guardiola.

De Bruyne meiddist á æfingu City í ágúst og hefur ekki getað spilað síðan. Upphaflega var áætlað að hann yrði frá í þrjá mánuði en það styttist greinilega í endurkomu miðjumannsins.

Benjamin Mendy er farinn að æfa með City á ný eftir meiðsli en óvíst er með þátttöku Ilkay Gundogan sem haltraði af velli í leik City og Hoffenheim í Meistaradeildinni í vikunni.

Leikur Liverpool og Manchester City er stórleikur umferðarinnar og slagur um toppsæti ensku úrvalsdeildarinnar. Leikurinn fer fram á sunnudaginn klukkan 15:30 og er í beinni útsendingu á Stöð 2 Sport.