Hazard dreymir enn um að spila fyrir Real

Eden Hazard segir það ennþá vera draum hans að spila fyrir Real Madrid. Forráðamenn Chelsea reyna hvað þeir geta að halda Belganum á Stamford Bridge.

Hazard skoraði eitt mark og lagði upp annað í 3-0 sigri Chelsea á Southampton í ensku úrvalsdeildinni í gær. Hann á aðeins eitt og hálft ár eftir af samningi sínum við Chelsea.

„Real Madrid er besta félag heims,“ sagði Hazard eftir leikinn.

„Ég vil ekki ljúga, það hefur verið draumur minn að spila fyrir Real síðan ég var krakki.“

„Ég vil ekki tala um þetta á hverjum degi, en við getum rætt framtíð mína fljótlega. Stundum vakna ég á morgnanna og vil fara. Aðra daga vakna ég og vil vera áfram. Þetta er erfið ákvörðun.“

Hazard vill ekki neyða félagsskiptin í gegn, ef hann fer frá Chelsea vill hann skilja við félagið í góðu.

„Ég vil það sem er best fyrir mig, en líka það sem er gott fyrir félagið því félagið hefur gefið mér svo mikið. Ég ætla ekki að segja já við að skrifa undir nýjan samning en hætta svo við það.“