Ríkið beðið um aðstoð við að breyta sulli í gull í Árborg

Fráveitumál í Sveitarfélaginu Árborg hafa lengi verið til vandræða, ekki síst á Selfossi þar sem allt skolp fer óhreinsað út í Ölfusá. Nú á að fara að taka á málinu með byggingu tveggja þrepa hreinsistöðvar við bakka Ölfusár við Geitanes sem verður mun ódýrari framkvæmd vegna nýrra lausna á sviði fráveitna.

Ölfusá skilgreind sem viðtaki

„Síðustu ár hafa bæjaryfirvöld hér verið að lemja hausnum í stein og reynt að fá Ölfusá skilgreinda sem síður viðkvæman viðtaka gagnvart stjórnvöldum og eftirlitsaðilum, þegar áin er skilgreind sem venjulegur viðtaki samkvæmt lögum og reglugerðum. Fráveituvatn sem leitt er út í síður viðkvæman viðtaka þarf einungis eins þreps hreinsun eða grófhreinsun eins og það er stundum kallað og átti samkvæmt áætlunum fyrri bæjarstjórnarmeirihluta að setja upp við Ölfusá. En aftur á móti áður en fráveituvatn er leitt út í venjulegan viðtaka eins og Ölfusáin er skilgreind, þá þarf tveggja þrepa hreinsun,“ segir Tómas Ellert Tómasson, bæjarfulltrú í meirihlutanum og formaður framkvæmda og veitustjórnar í Árborg.

Með tveggja þrepa hreinsun er fráveituvatn fyrst grófhreinsað, svo fer það í gegnum það sem kallað er annað þrep en það þrep miðar að því að ná niður magni svifagna og lífræns efnis í fráveituvatninu áður en það er losað í viðtakann.

„Það er svo hægt að ná niður magni þessara svifagna og lífræns efnis með ýmsum aðferðum svo sem setlaugum og slíku sem taka mikið pláss og eru kostnaðarsamar í framkvæmd. En nú er sem sagt komin fram tækni sem byggir á beltasíun sem er mun minni umfangs og töluvert ódýrari kostur en eldri lausnir. Það er svo mögulegt, ef þurfa þykir, að bæta við þriðja og síðasta hreinsunarþrepinu aftan við þetta hreinsivirki, sem myndi gera fráveituvatnið svo tært að það verði orðið drykkjarhæft áður en það er losað í Ölfusá,“ segir Tómas.

Tveggja þrepa hreinsistöð fyrir 1,2 milljarð króna

Nú hefur verið ákveðið að koma upp tveggja þrepa hreinsistöð við Ölfusá sem mun kosta 1,2 til 1,5 milljarða króna en áður var talið að þessi kostnaður yrði á bilinu 5 til 6 milljarðar króna.

„Við gerum ráð fyrir því að framkvæmdir við tveggja þrepa hreinsistöðina muni hefjast næsta haust, þ.e. haustið 2019 og að stöðin muni verða tekin í notkun árið 2021. Samhliða byggingu hennar munum við vinna að framtíðarlausn á fráveitumálum við strandlengjuna og láta kanna hvort að beltasíun henti ekki einnig þar. Það er mikið fagnaðarefni fyrir bæjaryfirvöld og íbúa í Árborg að komin sé fram lausn á mesta fráveituvanda sveitarfélagsins á ásættanlegu verði. Komandi framkvæmdir eru þó engu að síður dýrar og það myndi hjálpa okkur og öðrum sveitarfélögum mikið sem standa í svipuðum sporum að ríkisstjórnin sem nú er við völd myndi hætta að rukka inn virðisaukaskatt af slíkum framkvæmdum líkt og gert var á árunum 1995 til 2008,“ segir Tómas Ellert.

„Ég skora hér með á ríkisstjórnina og alþingismenn að koma nú til móts við byggðir landsins í komandi fjárlögum og fella niður virðisaukaskatt af fráveituframkvæmdum, enda í hæsta móti óeðlilegt að ríkið sé að hafa tekjur af skólpi. Aðstoðið okkur frekar við að breyta þessu sulli í gull.“