Skemmtilegt fólk í leiklistinni

Ég held ég fái þennan áhuga frá honum afa. Ég hef svo mikinn áhuga á fótbolta. Hann kenndi mér margt. Ég man eftir því þegar ég var yngri,“ segir Ísey Heiðarsdóttir sem vekur mikla eftirtekt í þáttaröðinni Víti í Vestmannaeyjum sem gerð er eftir samnefndri bók og kvikmynd og frumsýnd var á RÚV um helgina.

Ísey er dóttir Lísu Njálsdóttur en faðir Lísu er Njáll Eiðsson sem spilaði sjö landsleiki á sínum tíma fyrir íslenska karlalandsliðið í fótbolta og var hluti af ótrúlegu liði Vals árið 1987. Njáll þótti harður í horn að taka á vellinum. Gaf aldrei tommu eftir. Sá gamli hefur trúlega verið ánægður með nokkrar tæklingar sem Ísey sýnir í myndinni. Gunnar Helgason, höfundur bókarinnar, segir að Ísey blómstri í þáttunum. Þar séu hennar bestu senur.

Móðir hennar þótti liðtækur línumaður í handbolta og spilaði með Val og ÍBV en þurfti að hætta vegna brjóskloss. Faðir hennar, Heiðar Þór Pálsson, var efnilegur í blaki.

Ísey var valin úr um 600 stúlkna hópi og fer með hlutverk Rósu sem vill ólm spila á Orkumótinu en það mót er fyrir drengi.

„Ég hef aldrei snert á leiklistinni áður. Ég hef aldrei komið nálægt svona. Þetta var í fyrsta sinn,“ segir hún og bætir við að hún vilji gjarnan verða leikkona eftir atvinnumannsferilinn. Hún lék á sviði í vetur og hafði gaman af. „Það er svo skemmtilegt fólk þar. Alls staðar þar sem leiklistin er, þar er skemmtilegt fólk.“

Ísey býr í Vestmannaeyjum en karakterinn hennar, Rósa, spilar með Fylki. Hún var svolítið ósátt við að þurfa að klæðast hinum appelsínugula lit Fylkis. „Krakkarnir í skólanum eru mjög hneykslaðir á að ég sé alltaf í Fylkisbúningi og skilja ekki af hverju Gunnar Helgason þurfti að velja Fylki,“ segir hún og hlær.