Ari Eldjárn hleypur í minningu látins bróður

„Ég hef ákveðið að hlaupa 10 kílómetra í Reykjavíkurmaraþoninu til að safna áheitum fyrir Minningarsjóð Kristjáns Eldjárns,“ segir grínistinn Ari Eldjárn í færslu á Facebook.

Þar kemur fram að fjölskyldan hafi stofnað minningarsjóðinn í kjölfar þess að elsti bróðir hans lést árið 2002.

„Þetta er eitthvað sem ég hef alltaf ætlað mér að gera en aldrei haft mig í vegna gríðarlega lítils líkamlegs forms – en nú öllum afsökunum lokið af minni hálfu og ég ætla að láta slag standa.“

Minningarsjóður Kristjáns Eldjárns verðlaunar framúrskarandi tónlistarfólk árlega.

„Ég yrði afar þakklátur fyrir ykkar stuðning í þessu verkefni og hvet alla til að styrkja þennan frábæra sjóð.“