Innlent

Stefna að því að hætta gjaldtöku síðsumars

Birgir Olgeirsson skrifar
Hvalfjarðargöng voru opnuð árið 1998 en nú tuttugu árum síðar lítur út fyrir að gjaldtöku verði hætt.
Hvalfjarðargöng voru opnuð árið 1998 en nú tuttugu árum síðar lítur út fyrir að gjaldtöku verði hætt. Vísir/Pjetur
Stefnt er að hætta gjaldtöku í Hvalfjarðargöngum síðsumars. Gísli Gíslason, stjórnarformaður Spalar, greindi fyrst frá þessu í samtali við Ríkisútvarpið.

Í samtali við Vísi segir hann nákvæma dagsetningu ekki liggja fyrir en það muni skýrast þegar lengra líður á árið. Mun það ráðast á ýmsum þáttum.

Liggur fyrir hvað þarf að borga

„Það liggur nokkurn veginn fyrir hvað við þurfum að klára að borga áður en við hættum. Það er síðasta afborgun af fjármögnunarláni, svo þarf að borga út veglyklana, viðskiptakröfur og af rekstrinum. Svo endum við á að borga út hlutaféð.“

Gísli Gíslason, stjórnarformaður Spalar.Vísir/Eyþór
Hlutafélagið Spölur rekur Hvalfjarðargöng en Gísli segir félagið ekki hafa haldið nákvæmu yfirliti yfir heildarkostnaðinum við þessi göng. Í ár verða tuttugu ár frá því göngin voru opnuð en á þeim tíma sem þau voru gerð kostuðu þau um fimm milljarða króna, sem eru um 10 til 12 milljarðar í dag. 

Ríkið taki við göngunum

Hann segir Spöl eiga eftir að leggja það til að ríkið taki við hlutafélaginu sem er eigandi ganganna og síðan muni ríkið ráðstafa göngunum með þeim hætti sem það vill. 

„Við gerum þá voðalega lítið annað en að skila þessu af okkur. Spölur sem slíkur hefur bara heimildir til gjaldtöku þangað til ákveðnir kostnaðarliðir eru greiddir og þá þrýtur erindið.“

Leit út fyrir að afborgun yrði lokið árið 2015

Árið 2005 leit út fyrir að félagið Spölur gæti verið búið að borga göngin upp í kringum árið 2015. Ákveðið var hins vegar að endurfjármagna lánin með lægri vöxtum, lækka gjaldskrána og festa hana við árið 2018 og hefur sú áætlun gengið eftir að sögn Gísla. 

„Umferðin hefur vaxið verulega miðað við það sem við vorum að áætla en á móti hefur verðið lækkað bæði á raungildi og svo höfum við verið með lækkanir á gjaldskránni þannig að afsláttarkjörin eru bara brot af því sem við vorum með í upphafi,“ segir Gísli.

Hér má sjá graf yfir hvernig umferð hefur aukist í gegnum göngin frá því þau voru opnuð.Spölur
Vegurinn um Kjalarnesi í ruslflokki

Hann segir engan efa í sínum þegar hann er spurður hvort tvöfalda eigi Hvalfjarðargöngin.

„Það blasir við að það eru gríðarlega stór verkefni sem bíða úrlausnar ríkisins. Vegurinn á Kjalarnesi er kominn í ruslflokk. Umferðin þar hefur aukist verulega á einbreiðum vegi sem er með mörgum afleggjurum og slitlagið er orðið verulega dapurt. Þess vegna er alveg ljóst að ríkið þarf að taka verulega til hendinni bæði með Kjalarnesið og augljóslega út frá reglugerðum með Hvalfjarðargöng ef umferðaraukningin verður eins og hún hefur verið undanfarin ár.“ 

Spurður hvort að gjaldtaka sé góð leið til að fjármagna vegabætur segir Gísli aðferðina vera einfalda en pólitíkina á bak við ákvörðunina um að hefja gjaldtöku flókna. Gjaldtakan sé þekkt um allan heim og sú sem hefur átt sér stað í Hvalfjarðargöngum hafi gengið upp. 

„Í síðustu kosningum voru menn áfram um að styrkja innviðina. Síðasti samgönguráðherra hafði hug á samræmdri gjaldtöku á suðvesturhorninu en sá sem tekur við er ekki þeirrar skoðunar. Ég og fleiri bíðum eftir hvaða ákvörðun verði tekin því verkefnin leysa sig ekki sjálf.“

Spölur

Tengdar fréttir

Hver einasta framkvæmd myndi gleypa allt vegaféð

Stærðargráða aðkallandi samgöngubóta út frá höfuðborgarsvæðinu sést best á því að allt vegafé til nýframkvæmda á fjárlögum næði ekki að dekka kostnað við eina framkvæmd. Ráðherra telur gagnrýni á fjármögnun með veggjö




Fleiri fréttir

Sjá meira


×