Sautján metra hvalur dauður í Hvalsnesi

Sautján metra langan hval rak á land rétt utan við Sandgerði í gær. Dýrið var óvenju magurt, en líffræðingur segir sjaldgæft að slíkar skepnur endi dauðar á þurru landi.

Það voru Víkurfréttir sem sögðu fyrst frá því í gærkvöldi að ljósmyndari hefði gengið fram á dauða langreyði í fjörunni við Hvalsnes á Suðurnesjum. Langreyður er næststærsta hvaltegund sem fyrir finnst, en þeir geta náð lengd nokkuð yfir 20 metrum og þyngd upp á um eða yfir 70 tonn. Til samanburðar má nefna að til að ná slíkri þyngd þarf um 70 smábíla af gerðinni Kia Picanto.

Sölvi Rúnar Vignisson er líffræðingur hjá Þekkingarsetri Suðurnesja, en hann tók fyrstur manna sýni úr hvalnum í gær. Ekki liggur fyrir hvers vegna dýrið endaði í fjörunni, en Hafrannsóknarstofnun mun nú rannsaka atvikið. Sölvi segir hins vegar ekki víst að unnt verði að komast að orsök þess að skepnan drapst. Þó liggur fyrir að langreyðurin, sem er kvendýr, er aðeins um 17 metrar á lengd og langt undir meðalþyngd slíkrar skepnu. Hann segir því ljóst að ástand hennar hafi verið afar slæmt. 

Plastmengun í höfum heimsins hefur verið talsvert til umræðu undanfarin misseri og er talin orsök dauða fjölmargra sjávardýra. Sölvi segir þó alls ekki víst að svo sé í þessu tilfelli. Þannig éti skíðishvalir á borð við langreyði fyrst of fremst ljósátur og minni sjávardýr og þ.a.l. berist að jafnaði minna af plastefnum í líkama þeirra en tannhvala. 

Ekki liggur fyrir hvað gert verður við hræ skepnunnar, en Sölvi segir það geta gagnast talsvert við vísindarannsóknir. Þannig sé, þrátt fyrir nafngiftina Hvalsnes, afar óalgengt að langreyði reki á land með þessum hætti.