Matic gæti misst af leiknum við Chelsea

Nemanja Matic gæti misst af leik Manchester United og Chelsea í ensku úrvalsdeildinni vegna bakmeiðsla.

ESPN greinir frá því í dag að það sé óvíst hvort Matic nái leiknum við Chelsea þann 20. október næst komandi.

Hann fór til móts við serbneska landsliðshópinn eftir leik United og Newcastle á laugardaginn en var sendur aftur heim til Manchester vegna meiðslanna.

Marouane Fellaini æfði ekki með belgíska landsliðinu í gær vegna kvefs. Hann er þó enn í landsliðshópnum og gæti komið við sögu í leikjunum gegn Sviss og Hollandi.

United á fram undan erfiða leikjadagskrá eftir landsleikjahléð, liðið mætir Juventus tvisvar, Everton, Manchester City, Bournemouth og Chelsea í næstu sex leikjum.