Samtökin '78 og Reykjavíkurborg undirrituðu á þriðjudag nýja fræðslu- og þjónustusamninga. Í fræðslusamningi segir að Samtökin '78 muni áfram sinna hinsegin fræðslu í öllum grunnskólum Reykjavíkurborgar en um hinseginfræðsluna var samið árið 2014 og því er um framhald á sömu fræðslu að ræða.

Að þessu sinni er einnig samið um sérstaka hinseginfræðslu til starfsfólks leikskóla höfuðborgarinnar. Aukinheldur er samið um að Samtökin sinni jafningjafræðslu til nemenda grunnskóla borgarinnar líkt og áður.

„Við fögnum því sérstaklega að nú sé talað um fræðslu bæði fyrir starfsfólk grunnskóla og núna leikskóla. Aðaláherslurnar í fræðslu til starfsfólk leikskólanna eru fjölskylduform, þ.e. að sumir krakkar geta átt tvær mömmur eða tvo pabba en ekki einungis mömmu eða pabba. Einnig viljum við búa leikskólakennara undir það að börn geti verið með allskonar kyntjáningu og að gefa þeim svigrúm til að tjá kyn sitt og persónuleika eins og þau sjálf vilja,“ segir Daníel E. Arnarsson, framkvæmdastjóri Samtakanna '78.

„Börnum á að líða vel með sína kyntjáningu og kynvitund og við viljum aðstoða starfsfólk leikskólanna þegar kemur að þessum málum. Markmiðið er að við getum öll verið eins og við erum.“

Í fyrsta sinn er einnig samið um starfsemi hinsegin félagsmiðstöð var Samtakanna. Um er að ræða samstarfsverkefni Samtakanna '78 og frístundamiðstöðvarinnar Tjarnarinnar og er félagsmiðstöðinni tryggt nægt rekstarfé til að vera rekin út árið 2020.

Meðfram fræðslusamningnum var einnig undirritaður þjónustusamningur en í honum er tryggt að íbúar Reykjavíkurborgar geti leitað sé ráðgjafar hjá Samtökunum sér að kostnaðarlausu, að stuðningshópar séu starfræktir fyrir unglinga og börn og að lokum að Samtökin '78 geti sinnt daglegum rekstri sínum.