„Guti verður næsti stjóri Real Madrid"

Forseti Real Murcia segir að Guti, fyrrum leikmaður Real Madrid, verði næsti stjóri liðsins. Liðið er stjóralaust eftir að Zinedine Zidane hætti á dögunum.

Það kom mörgum í opna skjöldu er Zidane hætti eftir að hafa orðið meistari í þriðja skiptið á þremur árum í Meistaradeildinni.

Guti, sem hefur verið stjóri hjá U18 ára liði Real undanfarin ár, verður næsti stjóri Real ef marka má forseta Murcia en hann reyndi að klófesta Guti sem stjóra Real Murcia.

„Guti verður ekki næsti stjóri Murcia því hann er að fara stýra Real Madrid,” sagði Galvez í samtali við fjölmiðla.

„Ég vildi fá hann og það er svekkjandi að Zidane var ekki tvo daga lengur að ákveða sig. Guti hringdi og þakkaði mér fyrir áhugann.”

Guti spilaði með Real til margra ára en hann vann meðal annars fimm sinnum spænsku deildina og Meistaradeildina í þrígang.