Zara hættir sölu á umdeildu haturspilsi

Spænski fataframleiðandinn Zara á nú undir eilítið högg að sækja eftir að myndir af nýrri flík Zöru fóru á flug á netinu. Um er að ræða gallapils með tveimur ásaumuðum froskum sem netverjar telja vera hinn umdeilda hatursfrosk Pepe.

Í kjölfar gagnrýninnar hefur pilsið verið tekið úr sölu.

Vísir hefur áður fjallað um froskinn sem skaust upp á stjörnuhimininn í bandarísku forsetakosningunum á síðasta ári.

Pepe er teiknimyndafroskur í mannsmynd sem upphaflega birtist í teiknimyndasögusyrpunni Boy‘s Club sem hóf göngu sína árið 2005. Einnhverra hluta vegna tóku stuðningsmenn Donalds Trumps froskinn upp á sína arma og fóru að teikna hann í allra kvikinda líki.

Sjá einnig: Teiknimyndafroskur veldur usla

This is bad pic.twitter.com/8a2cbx0T70

— meagan (@meaganrosae) April 18, 2017

Eitt leiddi af öðru og fyrr en varði var búið að stimpla Pepe sem haturstákn og samtökin Anti-Defamation League settu Pepe á lista með táknum eins og sjálfum hakakrossinum í september á síðasta ári.

Pilsið umdeilda má sjá hér að ofan. Zara hefur ekki enn tjáð sig við fjölmiðla um málið en sem fyrr segir hefur pilsið verið tekið úr sölu.

Þetta er þó ekki í fyrsta sinn sem Zara hefur setið undir ásökunum um óvarlega skrautnotkun.

Þannig þurfti fyrirtækið að taka barnaflík úr sölu árið 2014 því hún þótti svipa fullmikið til gallana sem notaðir voru í útrýmingarbúðum nasista í seinna stríði.

Anyone who's surprised about Zara's Pepe the frog skirt probably doesn't remember this. I do. pic.twitter.com/GDaWmXSJng

— OhNoSheTwitnt (@OhNoSheTwitnt) April 18, 2017