Neymar slóst við liðsfélaga á æfingu Barcelona og strunsaði síðan í burtu

Brasilíumaðurinn Neymar missti stjórn á skapi sínu á æfingu Barcelona í morgunn og framkoma hans eykur örugglega  líkurnar að hann sé á förum frá spænska félaginu.

Neymar lenti saman við varnarmanninn Nelson Semedo sem kom til Barcelona í sumar. Þeir verða mögulega ekki liðsfélagar mikið lengur.

Sergio Busquets þurfti að halda aftur af Neymar sem síðan strunsaði af æfingunni í framhaldinu. Þetta náðist allt á myndband sem Daily Mail birti á vefsíðu sinni.

Franska liðið Paris Saint Germain er tilbúið að kaupa upp samning Neymar hjá Barcelona en þarf þá að borga fyrir hann 195 milljónir punda. Hann yrði með því langdýrasti knattspyrnumaður sögunnar.

Barcelona er að undirbúa sig fyrir leik á móti Real Madrid annað kvöld en hann er hluti af International Champions Cup Og fer fram í Miami í Bandaríkjunum.

Neymar mun ekki fljúga til baka til Spánar með liðsfélögum sínum því hann þarf fyrst að stoppa í Kína til að taka upp auglýsingaefni.

Það má búast við því að Barcelona og PSG ræði mögulega sölu á Neymar á meðan.

Neymar hefur farið á kostum á undirbúningstímabilinu. Hann skoraði tvö mörk á móti Juventus og sigurmarkið á móti Manchester United og spilaði bara fyrri hálfleikinn í báðum leikjum.