Ætlaði að koma Obama fyrir kattarnef en kattarhár komu upp um hana

Borin hafa verið kennsl á konu, sem ætlaði að ráða Barack Obama, fyrrverandi forseta Bandaríkjanna, bana. Kattarhár, sem fundust á pakka af sprengiefnum, voru rakin til katta í eigu konunnar. Breska dagblaðið The Guardian greinir frá.

Hin 46 ára Julia Poff er sökuð um að hafa í október á síðasta ári póstlagt tvo pakka sem innihéldu sprengiefni. Annar var stílaður á Barack Obama og hinn á þáverandi ríkisstjóra Texas-ríkis, Greg Abbott.

Sprengibúnaðurinn sprakk ekki og enginn hlaut því skaða af. Þó segir í skjölum úr dómsal að Abbot hafi einungis komist hjá „alvarlegum brunasárum og dauða“ vegna þess að hann opnaði pakkann ekki á réttan máta.

Helstu sönnunargögn í málinu eru talin vera kattarhár sem fundust á pakkanum sem ætlaður var Obama. Við rannsókn málsins kom enn fremur fram að hinni ákærðu „líkaði illa við forsetann“ og þá hafi hún verið „fúl út í Greg Abbott.“