Harry Potter-leikari ljóstrar upp sannleikanum um Ed Sheeran

Breski leikarinn Rupert Grint tók þátt í léttu glensi hjá MTV-sjónvarpsstöðinni um leið og hann kynnti þáttinn sinn The Snatch.

Var breski tónlistarmaðurinn Ed Sheeran kynntur á svið og beðinn um að taka lagið. Inn labbar Rupert Grint í gervi Sheerans og er við það að hefja flutning á einum af smellum tónlistarmannsins þegar hann segist ekki geta haldið þessari lygi áfram og uppljóstrar að Ed Sheeran er í raun karakter sem Grint skapaði.

„Sannleikurinn er sá að Ed er ekki raunverulegur,“ segir Grint en margir kannast eflaust við hann úr Harry Potter-myndunum.

„Eftir Potter vildi ég reyna á þolmörk mín, ég skapaði því karakter með rödd engils,“ sagði Grint og sagði Sheeran vera hans helsta afrek.

Grint lék í tónlistarmyndbandi við lagið Lego House eftir Ed Sheeran sem kom út í október árið 2011.

Þar má sjá Grint í fyrstu sem Ed Sheeran en þegar líður á myndbandið kemur í ljós að Grint er í raun að leika aðdáanda Sheerans sem hefur gengið allt of langt.