Ríkið auglýsir eftir meðferð fyrir áfengissjúklinga innan EES

Sjúkratryggingar hafa auglýst eftir meðferð fyrir áfengissjúklinga á Evrópska efnahagssvæðinu í stað þess að kaupa hana beint af SÁÁ. Ákvörðunin var tekin á grundvelli nýrra laga um opinber innkaup sem samþykkt voru í vetur. Samkvæmt lögunum er ýmis þjónusta sem áður var undanþegin útboðsskyldu orðin útboðsskyld ef opinber aðili ákveður að kaupa hana af fyrirtæki.

Halldór Ó. Sigurðsson, forstjóri Ríkiskaupa, segir að þetta nýja fyrirkomulag eigi við um fjölmarga samninga um heilbrigðis- og félagsþjónustu, þjónustu trúfélaga og fleira. Hann segir að samningar sem þegar hafa verið gerðir haldi gildi sínu þangað til þeir renna út. Eftir það fer af stað ferli þar sem opinberir aðilar auglýsa að það sé fyrirhugað að gera samning um tiltekna þjónustu við ákveðinn aðila. Þá geta aðrir aðilar á Evrópska efnahagssvæðinu, sem hafa áhuga á að veita sömu þjónustu, gefið sig fram. Eftir það er svo tekin ákvörðun um það hvort þjónustan er boðin út eða hvort gengið er til samninga við tiltekna aðila um þjónustuna.

Arnþór Jónsson, formaður SÁÁ, segir að samtökin hafi undanfarið starfað samkvæmt þjónustusamningum við ríkið en samningarnir séu hins vegar löngu útrunnir. Nú sé búið að auglýsa opinberlega á EES-svæðinu eftir aðila sem geti veitt þjónustuna.

„Það sem er undir er öll þjónustan sem ríkið hefur hingað til verið að kaupa af okkur með þjónustusamningum. En við höfum verið að bjóða miklu meiri þjónustu heldur en ríkið greiðir fyrir þannig að ég ætla bara að leyfa mér að fullyrða að það sé engin heilbrigðisþjónusta í landinu þar sem ríkið fær meira fyrir peninginn,“ segir Arnþór.

Arnþór segir að SÁÁ hafi ekki verið látið formlega vita af auglýsingunni. „Við fengum síðan upplýsingar um það óformlega frá Sjúkratryggingum Íslands að það væri kannski sniðugt fyrir okkur að kíkja á þetta ef við vildum vera með í næsta skrefi. Þannig fengum við upplýsingar og þá var þetta búið að vera þarna í nokkra mánuði,“ segir hann.

Steingrímur Ari Arason, forstjóri Sjúkratrygginga, segir þetta nýja fyrirkomulag til bóta. „Þetta er liður í því að gera þjónustuna gagnsærri og mér finnst það alveg tvímælalaust til bóta,“ segir Steingrímur Ari.