Prófaðu að hugsa áður en þú byrjar að rífa kjaft

Luke Rockhold, fyrrum millivigtarmeistari UFC, hefur látið Dana White, forseta UFC, heyra það vegna orða forsetans um síðustu helgi.

Þá sagði White að menn yrðu að vinna sér inn réttinn á því að fá eitthvað í UFC. Sagði að Rockhold væri að rífa kjaft og biðja um titilbardaga eftir að hafa verið rotaður í fyrstu lotu.

„Ég sagðist aldrei eiga skilið titilbardaga. Ég sagði að við í millivigtinni ættum skilið að vita hvar við stöndum og hvað eigi að gera. Við eigum skilið að vita hvar við stöndum,“ skrifaði Rockhold á Twitter.

„Þurfa menn að ávinna sér réttinn á einhverju hjá þessu fyrirtæki? Hvernig fór GSP að ávinna sér inn réttinn á titilbardaga í millivigtinni? Prófaðu að hugsa áður en þú byrjar að rífa kjaft.“

Dana er virkur á Twitter og var tiltölulega fljótur að svara Rockhold.

„GSP tapaði aldrei sínum titli. Bisping, GSP og aðdáendur vildu þennan bardaga. Haltu þig við að berjast og sitja fyrir. Láttu okkur um að raða upp bardögum,“ svaraði White.