Þorsteinn býður sig fram til þings með Sigmundi

Gunnar Bragi Sveinsson, þingmaður Framsóknarflokksins, segir stöðu flokksins skelfilega vegna hinna miklu innanflokksátaka sem þar hafa geisað undanfarna daga. Framkvæmdastjóri flokksins vildi ekki veita fréttastofu upplýsingar um hversu margir hafa skráð sig úr flokknum í dag og bar við trúnaði. Ljóst er þó að þeir eru fjölmargir og má nefna formenn framsóknarfélaga og ungliðahreyfinga víða um land auk stjórnar framsóknarfélagsins í Mosfellsbæ eins og hún leggur sig. Regína Helgadóttir, formaður framsóknarfélags Akureyrar og nágrennis sagði sig úr flokknum í dag, en hún segir stórt skarð höggvið í hann með brotthvarfi Sigmundar Davíðs Gunnlaugssonar. Sagði hún m.a. að hann væri einhver mesti leiðtogi sem flokkurinn hefði haft. 

Þá tilkynnti fyrrum þingmaðurinn Þorsteinn Sæmundsson jafnframt um úrsögn sína í dag. Hann hyggst bjóða sig fram til þings fyrir hreyfingu Sigmundar Davíðs. Ekki hefur enn komið fram undir hvaða heiti framboð Sigmundar býður fram og hann hefur ekki viljað svara því hvort framboðið tengist áður tilkynntum flokki Björns Inga Hrafnssonar. Aftur á móti skráði Sigurbjörn Magnús Gunnlaugsson, bróðir Sigmundar, lénið midflokkurinn.is fyrr í dag. Ekki náðist samband við Sigurbjörn við vinnslu fréttarinnar og Sigmundur Davíð vildi ekki staðfesta að þetta yrði endanlegt heiti flokksins.

Á því stutta kjörtímabili sem nú er að líða hafa átta manns setið á þingi fyrir Framsóknarflokkinn. Þar af er ljóst að minnst þrír hverfa frá, en auk Sigmundar höfðu þær Eygló Harðardóttir og Elsa Lára Arnardóttir tilkynnt á síðustu vikum að þær hygðust ekki gefa kost á sér áfram.

Varaformaðurinn Lilja Alfreðsdóttir vildi ekki veita viðtal í dag og hefur ekki sent frá sér formlega yfirlýsingu vegna málsins. Hún hefur þó ekkert sagt sem bendir til þess að hún muni segja sig úr flokknum. Eftir standa þá formaðurinn Sigurður Ingi Jóhannsson, þingflokksformaðurinn Þórunn Egilsdóttir og varaþingflokksformaðurinn Silja Dögg Gunnarsdóttir – sem ætla má að öll verði á listum flokksins áfram. Þá hyggst Gunnar Bragi Sveinsson áfram kljást við Ásmund Einar Daðason um fyrsta sæti í norðvesturkjördæmi. Hann segir þó ljóst að staða flokksins sé afar slæm vegna hinna miklu innanflokksátaka.