Koma að utan til að skoða stæði fyrir vindmyllur á Mosfellsheiði

Ketill Sigurjónsson lögfræðingur hefur að nýju óskað eftir viðræðum við Mosfellsbæ um „áform vegna vindmyllugarðs með það að markmiði að semja um aðgang til rannsókna og eftir atvikum uppsetningu vindmyllugarðs innan sveitarfélagsins“.

Þetta kemur fram í bréfi frá Katli sem bæjarráð Mosfellsbæjar tók fyrir í síðustu viku. Ketill er í forsvari fyrir aðila sem hann hefur ekki viljað að opinberaðir verði að sinni.

„Að ósk bréfritara voru nokkur orð afmáð úr skjalinu,“ segir í svari til Fréttablaðsins frá Mosfellsbæ sem vísaði að því leyti til í þá grein upplýsingalaga sem takmarkar aðgang að gögnum vegna einkahagsmuna. Eins og fram kom í Fréttablaðinu 16. desember 2016 leitaði Ketill einnig til Grímsnes- og Grafningshrepps, Ölfuss og forsætisráðuneytisins þar sem hugsanlegt vinnsluvæði á Mosfellsheiði snertir einnig þessa aðila.

„Senn líður að því að XXXXXX, samstarfsaðilar mínir komi til landsins til þess meðal annars að skoða aðstæður, með það að markmiði að unnt verði að hefja rannsóknir á ákjósanlegum stað/stöðum næstkomandi sumar. Þarna er um að ræða þrautreynda aðila úr XXXXorkugeiranum með mikla og góða þekkingu á öllu því sem við kemur nýtingu á vindorku og undirbúningi vindorkuverkefna,“ segir í bréfi Ketils sem óskaði eftir trúnaði um þá viðskiptahagsmuni sem fjallað sé um í erindinu að því leyti sem lög geri ráð fyrir. X-in tákna hér þau orð sem strikað var yfir að hans ósk áður en bréfið var afhent.

Ketill kveðst í bréfinu vilja forvitnast um viðbrögð forsvarsmanna Mosfellsbæjar um þá ósk að ganga til viðræðna við hann og samstarfsaðila hans. Einnig vill hann vita hvort þeir hafi mótað sér viðhorf gagnvart sams konar erindi hans frá því 15. nóvember í fyrra.

„Eins og gefur að skilja eru viðbrögð forsvarsmanna sveitarfélagsins afar mikilvægur þáttur í því hvaða svæði verður/verða sett í forgang vegna verkefnisins,“ segir í bréfi Ketils sem kveður samstarfsaðila sína væntanlega til landsins nú í fyrrihluta maímánaðar.

Bæjarráð Mosfellsbæjar sendi erindið til áframhaldandi skoðunar í skipulagsnefnd og fól bæjarstjóranum jafnframt að „hafa samband“ við Ketil.