Eldri borgari grunaður um að hafa rænt Kim Kardashian

72 ára gamall maður er í haldi lögreglu í Frakklandi grunaður um að vera einn þeirra fimm ræninga sem létu greipar sópa um híbýli raunveruleikastjörnunnar Kim Kardashian á síðasta ári. AFP greinir frá.

Maðurinn, þekktur sem Pierre B. var einn þeirra sautján einstaklinga sem handtekinn var í vikunni í tengslum við rannsókn málsins. Pierre er góðkunningi lögreglunnar og var meðal annars handtekinn vegna fíkniefnasmygls árið 2006.

Lögregla telur sig hafa sannanir fyrir því að hann hafi verið einn fimmenninganna sem ógnuðu Kardashian með byssu, bundu hana og kefluðu og stálu skartgripum að andvirði tíu milljóna evra virði áður en að þeir komust burt á reiðhjólum.

Að sögn lögreglu eru ræningjarnir fimm auk mannsins sem skipulagði ránið allir í haldi lögreglu þar með talið sextugur maður sem talinn er vera einn þeirra fimmenninga sem brutust inn.

Þremur af þeim sautján sem handteknir voru í vikunni hefur verið sleppt, þar með talið bílstjóri Kardashian. Bróðir hans, sem einnig var handtekinn, er þó enn í haldi, grunaður um að hafa látið ræningjana vita að lífvörður Kardashian væri ekki við auk upplýsinga um aðsetur Kardashian-fjölskyldunnar í París.

DNA-rannsókn af vettvangi glæpsins leiddi lögreglu á rétta slóð en meðal þeirra sem handteknir voru eru þrjár konur, þar af ein 65 ára gömul.