Harðir bardagar við ISIS-vígið al-Bab

Tyrkneskur hermaður féll og þrír særðust í hörðum bardögum við borgina al-Bab í norðurhluta Sýrlands í dag. Liðsmenn ISIS ráða ríkjum í al-Bab en tyrkneski herinn sótti inn í borgina ásamt sýrlenskum uppreisnarhópum í gær.

Í frétt SVT kemur fram að bardögunum hafi verið lýst sem þeim hörðustu sem Tyrklandsher hafi tekið þátt í, frá því að hann hóf sókn sína í Sýrlandi í ágúst síðastliðinn.

Recep Tayyip Erdogan Tyrklandsforseti segir að al-Bab sé á engan hátt lokatakmark tyrkneska hersins. „Lokatakmarkið er að hreinsa um fimm þúsund ferkílómetra svæði,“ segir forsetinn, en á umræddu svæði er meðal annars að finna al-Raqqa, helsta vígi ISIS, þar sem í búa um 300 þúsund manns.

Tyrkneski herinn og bandamenn hans hafa sótt hart í átt að miðborg al-Bab og segir Erdogan að einungis sé tímaspursmál þar til ISIS-liðar leggi á flótta.

Al-Bab er síðasta stóra vígi ISIS í Aleppo-héraði í norðurhluta Sýrlands, en sýrlenski stjórnarherinn hefur einnig sótt að borginni úr suðri.

Setið hefur verið um al-Bab í um viku eftir að sýrlenski stjórnarherinn lokaði leiðum suður af borginni. Uppreisnarhópar sem njóta stuðnings tyrkneska hersins höfðu þá þegar lokað leiðum austur, norður og vestur af borginni.