Sumrinu og nýju samstarfi fagnað í NORR11

Í gær var sumrinu fagnað í Norr11. Nýtt samstarf var kynnt til leiks í tilefni þess á milli Norr11 og Postulínu. Það var stuð og stemning hjá viðstöddum sem skáluðu í hvítvíni og gæddu sér á poppkorni.

Guðbjörg Káradóttir, leirkerasmiður úr hönnunarteyminu Postulínu, kynnti nýjungar í sumarpartíi Norr11 í gær. „Þetta er ný útgáfa af kertavösunum okkar. Þetta eru sem sagt blómavasar sem má snúa við og þá passa þeir fyrir kubbakerti. Kertavasarnir eru nú fáanlegir í svörtum steinleir, eingöngu fyrir Norr11, en hingað til hafa þeir verið til í hvítu postulíni,“ segir Guðbjörg um kertavasana sem eru handgerðir. „Engir tveir eru eins.“ Þess má geta að þetta er í annað sinn sem Postulína og Norr11 fara í samstarf.

Einnig var verið að fagna að nú er í fyrsta sinn hægt að versla vörur frá barnafatamerkinu As We Grow í Norr11. Teymið á bak við As We Grow var að sjálfsögðu á staðnum og kynnti merkið fyrir viðstöddum.