Enginn árangur á samningafundi Theresu May í dag

Engin niðurstaða fékkst á samningafundi Theresu May forsætisráðherra Bretlands og Jean-Claude Juncker forseta framkvæmdastjórnar Evrópusambandsins í dag um framtíð landamæra Norður Írlands og Írlands eftir Brexit.

Svo úrsögn Breta úr Evrópusambandinu verði að veruleika verður að ganga frá sérstökum úrsagnarsamningi samkvæmt 50. gr. Lissabon sáttamálans innan tveggja ára frá því ákvæðið er virkjað. Þetta þýðir að slíkur samningur þarf að liggja fyrir í allra síðasta lagi í lok mars 2019. Eitt af því sem greiða þarf úr er álitaefni sem lýtur að landamærum Írlands og Norður-Írlands eftir Brexit. Theresa May forsætisráðherra Bretlands átti í dag fund með Jean-Claude Juncker forseta framkvæmdastjórnar ESB um þetta mál í Brussel. Samhliða áttu sér stað viðræður um sama mál milli embættismanna Breta, Íra og framkvæmdastjórnar ESB.

Í morgun lágu fyrir drög að samkomulagi um landamæri Norður-Írlands og Írlands eftir Brexit sem fælu í sér samræmingu reglna Írlands og Norður-Írlands. Þetta hefði í reynd þýtt að Norður-Írland yrði áfram hluti af innri markaði ESB eftir Brexit þrátt fyrir að tilheyra Bretlandi sem hefur sagt sig úr sambandinu. Ekkert samkomulag náðist hins vegar á fundinum í Brussel og því er engin niðurstaðan komin í viðræður um landamærin. Þetta þýðir að frekari tafir verða á viðræðum um fríverslun eftir Brexit.

„Þrátt fyrir viðleitni okkar og verulegan árangur sem við og samningateymi okkar höfum náð undanfarna daga varðandi þau mál sem eftir standa, tókst okkur ekki að ná fullkomnu samkomulagi í dag. Ég er þess enn fullviss að við náum fullnægjandi árangri fyrir fund leiðtogaráðsins 15. desember. Þetta er ekki misbrestur, þetta er upphaf síðustu umferðarinnar og ég er viss um að við náum samkomulagi í þessari viku,“ sagði Jean-Claude Juncker forseti framkvæmdastjórnarinnar.