Loftlagsviðurkenningar veittar í fyrsta skipti

Reykjavíkurborg og Festa, miðstöðu um samfélagsábyrgð fyrirtækja, veittu loftslagsviðurkenningar í fyrsta skipti á Loftslagsfundi Festu og Reykjavíkurborgar sem fram fór í dag. Að því er fram kemur í frétt á vef Reykjavíkurborgar er markmið viðurkenninganna að vekja athygli á því sem vel er gert í loftslagsmálum og vera hvatning til annarra.

Hlaut sjávarútvegsfyrirtækið HB Grandi loftslagsviðurkenningu Festu og Reykjavíkurborgar, vefurinn loftslag.is hlaut fræðslu- og upplýsingaviðurkenningu vegna loftslagsmála og þá hlaut ISAVIA hvatningarviðurkenningu.

Aðrir aðilar sem voru tilnefndir að þessu sinni voru: ÁTVR, Eimskip, Fjallamenn, umhverfisfrettir.is, Náttúruverndarsamtök Íslands, Landvernd, Skógræktarfélag Reykjavíkur og Klappir.

Við veitingu viðurkenninganna horfði dómnefndin meðal annars til þess árangurs sem náðst hafði við að draga úr losun gróðurhúsalofttegunda. Einnig var litið til þess hvað aðgerða hafði verið gripið til í þeim tilgangi að upplýsa og fræða um loftslagsmál og að setja fram nýjar lausnir til að draga úr losun.

Í dómnefnd sátu S. Björn Blöndal, borgarfulltrúi og formaður borgarráðs, Jóhanna Harpa Árnadóttir verkefnisstjóri samfélagsábyrgðar hjá Landsvirkjun, einnig í stjórn Festuog Lára Jóhannsdóttir PhD og dósent við viðskiptafræðideild Háskóla Íslands. Starfsmaður dómnefndar var Hrönn Hrafnsdóttir á umhverfis- og skipulagssviði Reykjavíkurborgar.

Bent er á að loftslagsviðurkenningar verða aftur veittar árið 2018 og er hægt að senda inn tilnefningar strax á usk@reykjavik.is með fyrirsögninni „Loftslagsviðurkenning 2018“.