Montella rekinn frá AC Milan

Gamli miðjumaðurinn Gennaro Gattuso er orðinn þjálfari AC Milan eftir að hans gamli samherji, Vincenzo Montella, var rekinn sem þjálfari AC Milan í morgun.

Nýir eigendur AC Milan hafa eytt miklum fjármunum og í raun keypt nýtt lið en árangurinn hefur látið á sér standa. Milan er í sjöunda sæti ítölsku úrvalsdeildarinnar og þegar heilum 20 stigum á eftir toppliði Napoli.

Milan gerði markalaust jafntefli gegn Torino í gær en liðið hefur tapað sex af fjórtán leikjum sínum í deildinni. Montella tók við liðinu sumarið 2016. Hann þjálfaði áður meðal annars Sampdoria og Fiorentina.

Gattuso hefur verið að þjálfa U-19 ára lið Milan en tekur nú stóra skrefið og tekur við aðalliðinu.