Með nema í kennsluflug þótt hreyfillinn hefði ítrekað drepið á sér

Málmagnir í eldsneytis­tanki urðu til þess að það drapst á hreyfli kennsluflugvélar sem í kjölfarið var nauðlent á flugvellinum við Sandskeið.

Kennari og nemandi voru um borð í kennsluflugvélinni TF-FGC þegar hreyfill hennar byrjaði að hökta og drap á sér 13. september 2014. Kennarinn nauðlenti vélinni og sakaði mennina ekki.

Rannsóknarnefnd flugslysa (RNSA) segir í skýrslu um málið að hreyfill TF-FGC hafi verið í grannskoðun rúmum sjö vikum áður, þann 1. ágúst. „Þann 6. ágúst 2014 stöðvaðist hreyfillinn skyndilega við prófun á jörðu en þá hafði hann gengið í 5,3 stundir frá grannskoðun. Þann 20. ágúst 2014 var tilkynnt um atvik TF-FGC til RNSA þar sem hreyfillinn stöðvaðist í einkaflugi þegar flugmaður var að æfa snerti­lendingar á Reykjavíkurflugvelli. Það atvik var tekið til rannsóknar og fundust þá óhreinindi í eldsneyti og eldsneytissíu.“

Fram kemur að eldsneytiskerfi vélarinnar, sem er af gerðinni Diamond DA-20, hafi verið sent til skoðunar hjá framleiðandanum. Við rannsókn á svokölluðu mælistykki hafi fundust agnir í eldsneytishólfi þess. „Agnirnar voru nægilega stórar til þess að loka fyrir eldsneytisflæði um stund. Líklega hefur það gerst af og til,“ segir í skýrslunni.

Málmagnirnar voru sendar til greiningar hjá Nýsköpunarmiðstöð Íslands. „Við rannsóknina kom í ljós að agnirnar voru oftast spænir og voru þær ekki úr stykkinu sjálfu eða íhlutum þess,“ segir rannsóknarnefndin. Ekki hafi fundist skýring á því hvernig agnirnar komust í eldneytiskerfið en nefndin telji líklegast að það hafi gerst hjá framleiðanda þess.

„Það er mat RNSA að agnirnar sem fundust í eldsneytiskerfinu hafi líklega verið þar frá samsetningu og stíflað eldsneytisflæði af og til. Það hafi verið orsök þess að hreyfillinn hafi starfað óeðlilega, það er, að þegar hreyfillinn missti afl hafi agnirnar stíflað eldsneytisflæðið og stöðvað hreyfilinn.“