Tryggvi slær í gegn með óborganlegum eftirhermum á þekktum Íslendingum

„Gylfi gefur aldrei neitt upp í viðtöl og er mjög fjölmiðlaþjálfaður. Hann er alltaf svo hrikalega hógvær og ég ákvað bara að prófa hann,“ segir Tryggvi Freyr Torfason sem er heldur betur að slá í gegn á Snapchat hér á landi með skemmtilegum eftirhermum á þekktum Íslendingum.

Hann mætti í Brennsluna á FM957 í morgun og ræddi við strákana um athyglina sem hann hefur fengið undanfarna dag.

„Ég hef verið að herma eftir fólki frá því að ég var lítill strákur. Gylfi er með þennan fallega mjóa tón og ég byrjaði bara að fíflast með félögum mínum og æfði mig mikið þar sem hann er svo mikið í fréttum.“

Tryggvi tekur fyrir fyrir Snapchat-stjörnurnar Binna Glee, Sólrúnu Diego og marga fleiri á þeim vettvangi. Einnig er hann frábær að herma eftir Gylfa Sigurðssyni og síðan reyndi hann við Lars Lagerbäck í beinni útsendingu í morgun.

„Ég hef alveg verið í partý og einhver biður mig um að herma eftir sér. Það er mjög skrítið og viðkomandi er kannski með einhvern málgalla og þá er ég ekkert að fara jarða hann í partýinu.“

Hægt er að fylgjast með Tryggva á Snapchat með því að elta Tryggvu en í dag eru um það bil fimmtán þúsund manns að elta kappann.