Tveir látnir eftir jarðskjálfta í Eyjahafi

Minnst tveir eru látnir á grísku eyjunni Kos eftir stóran jarðskjálfta í Eyjahafi.

Skjálftinn, sem var 6,7 að stærð, varð um 12 kílómetrum norðaustur af Kos, nálægt ströndum Tyrklands og var á tíu kílómetra dýpi.

Skjálftinn varð klukkan hálf ellefu í gærkvöldi að íslenskum tíma og talið er að um tuttugu manns til viðbótar hafi slasast í skjálftanum og einhverjar byggingar orðið fyrir tjóni.

Þá slösuðust nokkrir til viðbótar í tyrkneska bænum Bodrum en þar var lítið um skemmdir, samkvæmt fréttastofu AFP. Menn urðu skjálftans einnig varir á grísku eyjunni Ródos. Allt eru þetta vinsælir ferðamannastaðir.