Vilja opna á meira millilandaflug úr Reykjavík með hljóðlátari þotum

Isavia vill að opnað verði á meira millilandaflug frá Reykjavíkurflugvelli, bæði til að létta á Keflavíkurflugvelli og til að stytta ferðatíma flugfarþega. Fjallað var um málið í fréttum Stöðvar 2 og rætt við  Jón Karl Ólafsson, framkvæmdastjóra flugvallasviðs Isavia. 

Sú ákvörðun British Airways að hefja beint flug til Keflavíkur frá London City-flugvellinum gæti stytt ferðatíma farþega úr miðborg Lundúna um eina til tvær klukkustundir þar sem fljótlegra er að komast út á flugvöllinn og innritunartími þar er helmingi styttri en á öðrum völlum borgarinnar. 

En þá vaknar sú spurning hvort ekki mætti nota Reykjavíkurflugvöll með sama hætti og ná þannig ennþá meiri styttingu ferðatíma milli höfuðborga Bretlands og Íslands. 

Þetta er raunar það sem Isavia vill að verði leyft, að sögn framkvæmdastjóra flugvallasviðs, sem segir Isavia í viðræðum um að breyta reglum Reykjavíkurflugvallar. 

„Við erum að ræða við yfirvöld og reyna að athuga hvort það sé ekki hægt að fá þessu banni, - eða þessum reglum breytt, - að því leyti að þær verði þá opnari þannig að það sé hægt að stunda meira flug hér út. Þannig að við erum að beita okkur í því, já, að fá að minnsta kosti umræðu í gang um málið,“ segir Jón Karl. 

Millilandaflug hefur raunar ætíð verið stundað frá Reykjavíkurflugvelli en áætlunarflug er þó aðeins leyft með undanþágum til Grænlands og Færeyja. Jón Karl bendir á að meðan Keflavíkurflugvöllur sé orðinn þéttsetinn sé völlurinn í Reykjavík vannýttur. 

„Reykjavíkurflugvöllur er einn af þeim völlum sem væri hægt að nota hugsanlega til að létta álagið, eða dreifa aðeins betur álaginu, eins og það er í dag. Því að það er í sjálfu sér óþarfi að láta fullkominn flugvöll standa hérna án þess að hann sé nýttur eins og hægt er.“ 

Jón Karl telur að andstaða gegn þotuflugi frá Reykjavík geti skýrst af því að menn óttist aukinn hávaða. 

„Menn halda að það sé ónæði af þessu. En það er raunverulega ekki alveg rétt því að þessar nýju flugvélar, sem um er að ræða, eins og þessar Embraer-þotur, sem British Airways er að nota, eru mjög hljóðlátar, - og raunar hljóðlátari heldur en þær vélar sem eru að fljúga inn á völlinn í dag.“ 

Flugstöðin er ekki upp á marga fiska en flugbrautirnar duga flestum nýjum gerðum farþegaþotna af smærri gerðinni. 

„Þetta eru 100-130 sæta flugvélar og þær þurfa þetta á bilinu 1.200-1.400 metra brautir, sem er svipað og brautirnar hér í Reykjavík eru.“ 

Tveir þriðju hlutar landsmanna búa í innan við fimmtán kílómetra radíus frá Reykjavíkurflugvelli og, að mati Jóns Karls, fengist verulegt hagræði með styttingu ferðatíma. 

„Þetta myndi stytta ferðatíma verulega. Þú þyrftir að mæta mun seinna á völlinn. Þú gætir hugsanlega verið með innritun klukkutíma fyrir brottför hér í Reykjavík, sem þarf tvo tíma á stærri flugvöllum. Þannig að þetta myndi geta verið verulegt hagræði fyrir farþega,“ segir Jón Karl.

Hér má sjá frétt Stöðvar 2: