Segir bónuskerfið í fjármálageiranum stefna í tóma vitleysu

„Mér finnst nú þessar launagreiðslur og bónuskerfið í fjármálageiranum vera að stefna í tóma vitleysu,“ segir Vilhjálmur Bjarnason, þingmaður Sjálfstæðisflokksins. „Og jafnvel er þetta orðið verra en í gömlu bönkunum árin 2003 til 2008.“

Fimm fyrirframgreiðslur Landsbankans til eignarhaldsfélagsins LBI, sem sér um eignir gamla Landsbankans, á undanförnum níu mánuðum upp á samtals um 110 milljarða króna tryggðu stjórnendum LBI samanlagt á bilinu 350 til 370 milljónir í bónus, samkvæmt útreikningum Markaðarins fylgirits Fréttablaðsins um efnahagsmál.

Umfangsmikið bónuskerfi LBI virkjaðist undir lok síðasta árs en samkvæmt því þá fá helstu stjórnendur LBI meðal annars tiltekinn hluta hverju sinni af þeirri fjárhæð sem Landsbankinn fyrirframgreiðir inn á skuldina við LBI.

Stjórnendur LBI höfðu hinsvegar enga aðkomu að því að Landsbankinn greiddi upp skuldir sínar fyrr en ella heldur er um að ræða aðra þætti líkt og sífellt betri kjör á erlendum lánamörkuðum sem bankinn hefur nýtt sér til að sækja sér fjármagn og með því greiða upp óhagstæðari skuldabréf við LBI.

„Það að bónusgreiðslur séu með þessum hætti þar sem að [stjórnarmennirnir] eru að engu leiti þess valdandi að nýji Landsbankinn greiði skuldir sínar hraðar er ekki forsvarandi fyrir venjulegu fólki. Ég skil þetta ekki,“ segir Vilhjálmur.



Hann segir ákveðið höfrungahlaup í gangi þegar kemur að launa- og bónusgreiðslum innan fjármálafyrirtækja og það er almenningur og viðskiptavinir þeirra fyrirtækja sem koma til með að borga það.

„Og bankarnir verða í rauninni ekki starfhæfir og þetta sýnir nauðsyn þess að aflétta hér öllum hömlum á erlendum viðskiptum svo að íslendingar geti stundað viðskipti í erlendum bönkum.“