Hammond með skemmtilega kveðju frá sjúkrahúsinu

Breski sjónvarpsmaðurinn Richard Hammond sem gerði garðinn frægan í bílaþáttunum Top Gear var fluttur með þyrlu á sjúkrahús eftir alvarlegt bílslys í Sviss um helgina.

Slysið varð við tökur á þættinum The Grand Tour sem hann hefur umsjón með ásamt þeim Jeremy Clarkson og James May.

Hammond var með meðvitund og gat talað eftir slysið en er með brákað hné. Enginn annar var í bílnum þegar slysið átti sér stað.

Jeremy Clarkson lýsti slysinu sem því stærsta og hræðilegasta sem hann hafi séð en að blessunarlega virðist Hammond vera lítillega slasaður.

Hammond sendir aðdáendum sínum kveðju í myndbandi sem komið hefur verið fyrir á YouTube. Myndbandið er tekið á sjúkrahúsi í Sviss.