Svalasta fjölskylda landsins riggar upp rokktónleikum

Hjónin Sólný Pálsdóttir og Sveinn Ari Guðjónsson frá Grindavík kynntust í hljómsveit á framhaldsskólaárunum og eiga nú fimm syni. Fjölskyldan, sem er stundum kölluð Mánahraunsrokkararnir, er afar tónelsk og gerir sér lítið fyrir og riggar upp rokktónlistarveislu um komandi helgi í Grindavík, á bæjarhátíðinni Sjóaranum síkáta. Verða bönd eins Pink Floyd, Marillon, Yes og Queen höfð í hávegum en auk þeirra nýrra efni í bland.  

Er þetta í annað skiptið sem fjölskyldan blæs til slíkra rokktónleika en í fyrra rokkuðu þau í Grindavíkurkirkju við góðan orðstýr. Nú dugir hinsvegar ekkert minna en íþóttahús bæjarins undir herlegheitin.

„Hugmyndin að baki þessa framtaks er er dálítið skemmtileg en hún kviknaði í kjölfar útskriftarferðar elsta sonar okkar, Guðjóns, er hann lauk námi við Verslunarskólann. Í stað þess að fara í hefðbundna útskriftarferð með félögunum fann hann siglingu á Facebooksíðu hljómsveitarinnar „Yes“ um Karabískahafið. Hún ber heitið Cruise to the edge og er svona sigling þar sem tónlistin er í hávegum höfð og stór bönd í bland við áhugafólk troða upp,“ útskýrir Sólný. Hún segir þau hafa tekið vel í hugmyndina enda ekki annað hægt.

„Guðjón er alinn upp við þessa tónlist og ákvað nú væri kominn tími til að kynna foreldra sína nýjum böndum innan tónlistarstefnunnar og þannig lokaði hann hringnum. Áhugamenn fá tækifæri til að stíga á stokk í prógramminu en þurfa til þess að senda inn prufur. Guðjón sendi strax inn og lét okkur ekki vera fyrr en við sendum líka. Það var því dálítil spenna hér á heimilinu undir lokin og þegar niðurstöður fóru að detta í hús og gleðin ómæld þegar það kom í ljós að við værum öll inni,“ segir hún glaðlega.

Vöktu mikla athygli

Úr varð að þau fóru utan og vöktu sannarlega athygli meðal samferðamanna og ekki hvað síst umsjónarmannanna, sem vissu ekki um fjölskyldutengslin fyrr en á hólminn var komið. Það þótti býsna óvenjulegt að svo margir úr sömu fjölskyldunni skyldu komast í gegn.

„Þetta gekk svo vel og var svo ótrúlega gaman. Ótrúleg upplifun fyrir að fá að spila með frábæru fólki allsstaðar af úr heiminum, þekkta og áhugamenn. Ég tók til dæmis uppáhaldslagið mitt Changes með Yes vitandi af söngvara bandsins í salnum,“ segir hún og skellir uppúr. „Öll ferðin snerist bara um tónlist og fá að spila með ýmiskonar tónlistarfólki að okkur fannst ekki annað koma til greina en að prófa þetta í okkar heimabæ,“ útskýrir Sólný og viðurkennir að þau séu orðin verulega spennt fyrir sunnudeginum.

Tónleikarnir, sem slá botninn í hátíðarhöldin á sunnudag, verða uppfullir af flottu tónlistarfólki auk fiðluleikara frá Bandaríkjunum og gítarleikari frá Kanada sem þau einmitt kynntust í siglingunni. Hefjast leikar klukkan 17.00.