Bjóða kassabílaferðir

Þeir Hörður Valur Reynisson, Úlfur Ægir Halldórsson, Brynjar Bragi Einarsson, Jón Sölvi Magnússon og Ari Páll Egilsson hafa stofnað fyrirtæki utan um kassabílarekstur.

Ari Páll: Þetta byrjaði allt á teikningu þegar ég var í sumarbústað, þar kviknaði hugmyndin að því að smíða kassabíl. Nokkrum mánuðum seinna fannst okkur, mér og vinum mínum, upplagt að byrja, Jón Sölvi var alveg til í það, Hörður styrkti okkur mjög mikið og líka Brynjar.

Úlfur Ægir: Ég kom ekki inn í þetta dæmi fyrr en nýlega. Eiginlega bara fyrir svona mánuði.

Hvar fenguð þið efnið?

Ari Páll: Hér og þar, sumt í bílskúrum heima hjá okkur og dekkin eru af barnavagni sem við fundum í Góða hirðinum.

Brynjar: Bíllinn var eiginlega ekki kominn á götuna fyrr en í síðasta mánuði. Það tók allt sinn tíma. Svo erum við alltaf að endurbæta og gera við.

Ari Páll: Stuðarinn er til dæmis nýr núna og dekkin voru alltaf að detta af til að byrja með en það er komið í lag.

Nú fara þeir félagar að spjalla um gang verksins sín á milli og inn í það fléttast vatnsblöðrustríð sem gekk ekkert of vel því enginn þeirra kunni að hnýta hnúta á blöðrurnar.

Jón Sölvi: Svo ákváðum við að halda áfram að smíða kassabíla og erum búnir með annan. Hann er núna inni í skúr í smá viðgerð en hann er fínn.

Úlfur Ægir: Já, við erum nefnilega búnir að stofna fyrirtæki sem snýst aðallega um að skutla börnum heim úr Háteigsskóla á kassabílum. Þá stýrir farþeginn og við ýtum. Túrinn kostar 50 til 100 krónur, eftir vegalengd. Við auglýsum þessa þjónustu í skólablaði Háteigsskóla.

Brynjar: Kassabíll númer tvö er með sæti og skotti, við notum þetta skott fyrir yngri krakka. Stundum köllum við upp að við séum að selja ferðir og einu sinni komu tveir litlir krakkar til okkar með mömmu sinni og langaði ógeðslega mikið að fara í bíltúr. „Nei, við erum ekki að fara að kaupa kassabíl,“ sagði mamman en við útskýrðum að við værum bara að selja ferðir. Hún sagði að krakkarnir gætu ekki stýrt en við sýndum henni skottið og græddum alveg dálítið á þessu.

Ferðist þið mikið í þessum bíl sjálfir?

Jón Sölvi: Já, mjög mikið. Við gerðum hann upphaflega handa okkur. Leigubílahugmyndin kom seinna.

Hörður Valur: Nýjasti kassabíllinn á að vera með keðju og pedölum svo enginn þurfi að ýta. Við eigum sko orðið um 1.000 kall í bauknum okkar sem við getum keypt efni fyrir.