Vandræðalega heimakær

Ragga kemur fram ásamt fríðum hópi tónlistarmanna á tónleikunum í kvöld. Auk hennar og Guðmundar Péturssonar koma fram Bubbi Morthens, Sigríður Thorlacius og Högni Egilsson, Ellen Kristjáns, KK og Bjartmar Guðlaugsson. „AISHA samtökin hafa það að markmiði að efla konur í Palestínu sem hafa t.d. misst eiginmenn sína eða lent í erfiðum aðstæðum og áföllum,“ segir Ragga sem ætlar að syngja og leika á píanó með manninn sinn, Guðmund Pétursson gítarleikara, sér við hlið.

Hún segist oft taka að sér að syngja á tónleikum til styrktar ákveðnum málefnum, líkt og aðrir tónlistarmenn á Íslandi. „Ég er til í að koma fram fyrir öll góð málefni, enda eru svo margir í samfélaginu og í heiminum sem þarfnast hjálpar. Ég bara veit og hef upplifað hvað svona safnanir geta skipt miklu máli, jafnvel breytt öllu fyrir fólk sem er að glíma við erfiðleika – í það minnsta gerir þetta aðstæður fólks ögn bærilegri og svo held ég líka að fólki þyki vænt um stuðninginn, kærleikann og samhuginn sem fylgir styrktartónleikum.“

Heppin með verkefni

Þegar Ragga er spurð hvað hafi á daga hennar drifið síðustu mánuði kemur í ljós að hún hefur haft í nógu að snúast. Hún er nýkomin heim úr tveggja vikna tónleikaferðalagi um Austurríki, sem hún segir að hafi verið dásamlegt. „Í lok síðasta árs gaf ég út nýtt lag sem heitir Yoanna, hélt stóra tónleika í Háskólabíói, fór í tónleikaferð um Þýskaland og tók jólavertíðina með trompi, ásamt vinum mínum í söngtríóinu Eitthvað fallegt. Í febrúar kom ég fram sem sólisti með stórsveit norðurþýska útvarpsins (NDR Bigband), í mars fórum við í ótrúlega skemmtilegt tónleikaferðalag um Eistland og síðan söng ég fyrir Maríu Magdalenu í Jesus Christ Superstar með frábærum hópi tónlistarmanna. Þetta er svona það sem stendur upp úr og ég man eftir, enda er ég svo heppin að hafa mjög fjölbreytt verkefni.“

Ný plata í vinnslu

Fram undan eru næg verkefni sem Ragga hlakkar til að takast á við. „Það er hellingur í gangi, sem betur fer. Ég er á leiðinni til London til þess að vinna með upptökustjóra fyrir nýja plötu sem kemur út í byrjun næsta árs. Síðan er ég að semja tónlist við barnaleikrit ásamt Bergrúnu Írisi. Ég mun koma fram á Secret Solstice og með NDR Bigband í júní. Við ætlum að skella okkur á þjóðlagahátíð á Siglufirði, halda tónleika í Norræna húsinu, spila á Djasshátíð Reykjavíkur og á spennandi tónlistarhátíð í Oldenburg í Þýskalandi þar sem þemað er farfuglar og hvernig þeir tengja lönd og menningu saman. Síðan skellur haustið á og þá hrúgast vonandi inn fleiri spennandi verkefni, en ef ekki mun ég einbeita mér alfarið að plötugerð og barnaleikriti.“

Kennir jóga vikulega

Fyrir utan að koma fram og syngja fyrir fólk ætlar Ragga að slaka eins mikið á og hún getur með fjölskyldunni og nýjum fjölskyldumeðlimi sem er Vitamix-blandari. „Ég er að sigla inn í nýtt tímabil eftir að ég fjárfesti í græjunni og á mjög erfitt með að slíta mig frá eldhúsinu. Ég er á fullu að gera alls konar tilraunir til eflingar heilsu og almennrar vellíðunar. Ég er svo heimakær að það er nánast vandræðalegt, en vinnan mín er samt þannig að mér tekst oftast ágætlega að finna jafnvægi milli hins inn- og úthverfa lífs. Ég kenni svo jóga einu sinni í viku í Yoga Shala í Skeifunni þannig að ég verð að vera dugleg í jóga og svo stefni ég að því að hlaupa 10 km í Reykjavíkurmaraþoninu. Við gleymdum að plana eiginlegt sumarfrí eins og oftast en við reynum að stela rólegum dögum sem koma inn á milli til að njóta sumarsins og vera dugleg að hitta vini og fjölskyldu.“

Þegar Ragga er spurð hvaða lag henni þyki vænst um af þeim lögum sem hún hefur sungið hugsar hún sig vel um. „Þetta er erfið spurning. Kannski lagið Litla barn sem kom út á plötunni Svefnljóð.“

Hún er hins vegar ekki lengi að svara því hvaða lag er í uppáhaldi hjá henni þessa dagana. „Það heitir ‘Till April is Dead’ og er flutt af æðislegri tónlistarkonu frá Bretlandi sem heitir Lisa Knapp. Ég fæ hreinlega ekki nóg af henni.“

Tónleikarnir í kvöld hefjast klukkan 20.