Smíðaði fermingargjöfina

Mér datt þetta í hug af því að mig langar til að verða gullsmiður. Vinur hans pabba, Kjartan Örn, er með gullsmíðaverkstæðið Orr og ég fékk að smíða hringinn hjá honum. Hann hjálpaði mér,“ segir Kormákur Rögnvaldsson, þrettán ára þúsundþjalasmiður en hann smíðaði silfurhring handa Helgu Guðrúnu, æskuvinkonu sinni og frænku, í fermingargjöf.

„Hún er þremur mánuðum og tuttugu og sjö dögum eldri en ég,“ segir hann en þau hafa verið góðir vinir frá því þau fæddust.

Hringurinn kom Helgu skemmtilega á óvart. „Hann er mjög flottur. Ég var með hann í fermingarveislunni,“ segir hún og viðurkennir að þetta setji örlitla pressu á hana að finna sniðuga gjöf handa Kormáki þegar hann fermist á næsta ári.

 „Jú, en annars reynum við alltaf að gefa hvort öðru spes afmælis- og jólagjafir, þannig að ég er alveg farin að spá í hans gjöf,“ segir Helga.

En hvernig gekk silfursmíðin fyrir sig?



„Við vorum þrjá klukkutíma að smíða hringinn. Kjartan þurfti stundum að afgreiða viðskiptavini og þá beið ég bara á meðan. Ég var ekki alveg búinn að ákveða hvernig hringurinn átti að vera þegar við byrjuðum,“ segir Kormákur. Hringurinn hafi smám saman tekið á sig mynd þegar þeir hófust handa.

„Við byrjuðum á að saga tvo búta af silfri, svo beygðum við þá í 90 gráður og bræddum saman. Við notuðum sög og tangir, eina sem beygði í horn og aðra sem gerði þetta að hring eða gíg. Steinninn fór ofan í og svo hömruðum við það utan um steininn. Svo notaði ég pússvél til að pússa hringinn,“ útskýrir Kormákur og segist hafa skemmt sér vel á verkstæðinu.

„Þetta var rosalega gaman. Það var ekki langt síðan ég ákvað að verða gullsmiður en ég skoða mikið hringa og skartgripi í búðum. Ég hafði ekki prófað að smíða svona áður, hafði bara prófað að smíða tréhring í smíði í skólanum þegar ég var lítill,“ bætir hann við og segist farinn að teikna upp hugmyndir að fleiri skartgripum sem hann langar að smíða. 

Í framtíðinni stefni hann jafnvel á hönnun eða annað skapandi nám.

„Smíði og textílmennt eru skemmtilegustu fögin í skólanum. Ég hef saumað eina peysu sem amma hjálpaði mér við. Mig langar að fara í VMA sem er eini verklegi skólinn á Akureyri en þar er listnámsbraut,“ segir Kormákur. Annars snúast áhugamálin um lestur góðra bóka. „Ég les mest fantasíur.“