Vaknar snemma og kveikir sjaldan á sjónvarpinu

Rebekka Rán á hálfrar aldar afmæli í dag og hún er í miðjum prófum. „Ég ákvað á gamals aldri, fyrir fjórum árum, að fara í nám í lögfræði í Háskóla Íslands, með fullri vinnu.  Er núna á fyrra ári í meistaranáminu og á svo bara ritgerðina eftir og þrjú fög. En þetta þýðir að veisluhöldum verður frestað fram í júní, bæði prófanna vegna og í von um betra veður, þótt það hljómi furðulega akkúrat núna í sól og hita (í gær). Það hefur ekki alltaf viðrað mjög vel á afmælisdaginn minn.“

Hugmyndin hjá Rebekku Rán er sú að halda alvöru garðpartí í tilefni tímamótanna. „Við höfum verið að taka garðinn í gegn og erum búin að teppaleggja hann með nýju grasi. Hækkuðum hann líka upp því hann hentaði ekki nógu vel fyrir partí með þeim halla sem var. Nú er bara eftir að snurfusa aðeins og góðar horfur á að garðurinn verði kominn í stand í júní.“

Að BA-prófinu í lögfræði loknu kveðst Rebekka Rán hafa skipt um vinnu og byrjað að starfa hjá Útlendingastofnun. Þar sé hún mjög ánægð þótt oft sé þar tekist á við flókin og þung mál. „Vinnan útheimtir mikla lögfræðilega glímu og það er hún sem mér finnst áhugaverð. Ég byrjaði í hælisteyminu og er núna í dvalarleyfisteyminu,“ upplýsir hún. En hvað um myndlistina?

„Ég er myndlistarkona og er enn að leigja stúdíó í Garðabæ, fer þangað eins oft og ég hef átt kost á, þótt það hafi verið aðeins sjaldnar en ég hefði óskað sjálf. En það breytist væntanlega því ég verð ekki í náminu í sumar, bara í vinnunni. Ég hef á þessum fjórum árum tamið mér að vakna mjög snemma á morgnana og kveiki lítið á sjónvarpinu svo að það hefur fjölgað klukkustundum í sólarhringnum. Því finnst mér ég eiga rosa mikinn tíma þegar náminu sleppir.“

Geir Þorsteinsson er maki Rebekku Ránar til sjö ára og samanlagt eiga þau tvö börn, Ellen Geirsdóttur sem er tvítug á árinu og Baltasar Darra sem er að verða 17 ára. Svo eiga þau þrjá hunda, eina tólf ára labradortík, og tvær whippet­tíkur, aðra þriggja mánaða og hina þriggja vikna svo það er í mörg horn að líta. En hvernig líður Rebekku Rán með aldurinn?

„Það sem upp úr stendur er gríðarlegt þakklæti fyrir það sem maður hefur fengið í þessu lífi, fyrir þá foreldra sem manni auðnaðist að fæðast hjá og þótt það hljómi eins og slitin tugga þá er það sem máli skiptir að hafa góða heilsu og vera í góðu sambandi við sína nánustu.“