Mundi lundi reyndist vera lögblindur

Anna Þóra Björnsdóttir er einn af meðlimum í grínfélaginu Lunda. Það félag á lukkudýr sem er lundi sem heitir Mundi. Nýverið fór meðlimi hópsins að gruna að Mundi væri með lélega sjón og þá bauðst Anna til að sjónmæla hann.

Anna Þóra á gleraugnaverslunina Sjáðu ásamt eiginmanni sínum, Gylfa Björnssyni. Anna tók að sér að sjónmæla lundann Munda í gær og í ljós kom að hann er lögblindur.

„Það er búið að taka sjónpróf á Munda lunda og það gekk svona svakalega vel. Hann var alveg til friðs. En í ljós kom hann er lögblindur og þarf bara að fá hljóðbækur það sem eftir er,“ segir Anna og hlær. „Það er sem sagt ekkert hægt að gera fyrir hann. Alveg sama hvað hann fengi mikinn styrk, það myndi ekkert gera fyrir hann.“

Mundi var stilltur og prúður í sjónmælingunni og reytti af sér brandara að sögn Önnu.

„Hann sagði bara nokkra brandara og svo ætlar hann að halda áfram í Græna herberginu á miðvikudaginn.“

Spurð nánar út í hvað mun eiga sér stað í Græna herberginu á miðvikudaginn segir Anna: „Við í grínfélaginu Lunda ætlum að vera með uppistand, við erum átta í þessum hóp og hver og einn verður með sitt uppistand. Við vitum ekkert hvað næsti maður ætlar að segja. Þetta er í fyrsta skipti sem þessi klúbbur kemur fram en við höfum öll komið fram í hvert í sínu lagi,“ útskýrir Anna.

Þess má geta að flestir í hópnum hafa sótt uppistandsnámskeið hjá Þorsteini Guðmundssyni. „Flestir hafa farið í námskeið, en ekki Mundi, hann þurfti ekkert á því að halda. Hann er bara langfyndnastur.“ Hópinn skipa þau Agnes Wild, Elva Dögg Hafberg Gunnarsdóttir, Hrafnkell Ásgeirsson, Kristín María Gunnarsdóttir, María Guðmundsdóttir, Ólöf Magnúsdóttir, Theódór Ingi Ólafsson ásamt Önnu Þóru og auðvitað Munda lunda.

„Mundi er sem sagt heiðursfélagi og hann verður með okkur á miðvikudaginn. En þar sem hann á það til að ganga á veggi og annað langaði okkur að reyna að hjálpa honum og ég bauðst þá til að sjónmæla hann,“ útskýrir Anna. „En þar sem hann er lögblindur getur hann gleymt því að fá sér gleraugu, því miður.“