"Þú ert að fara að falla tíkarsonurinn þinn“

Það fauk í króatíska miðjumanninn Ivan Rakitic í leik Barcelona og Granada í fyrradag.

Rakitic fékk að líta gula spjaldið á 77. mínútu eftir viðskipti sín við Andreas Pereira sem er lánsmaður frá Manchester United.

Rakitic var langt frá því að vera sáttur með dóminn og í kjölfarið öskraði hann á Pereira: „Þú ert að fara að falla tíkarsonurinn þinn.“

Ekki fallega sagt hjá Rakitic þótt hann hafi væntanlega haft rétt fyrir sér þegar hann sagði að Granada myndi falla.

Granada, sem íslenski landsliðsmaðurinn Sverrir Ingi Ingason leikur með, er í nítjánda og næstneðsta sæti spænsku úrvalsdeildarinnar, átta stigum frá öruggu sæti.

Hvort Pereira verður með Granada í B-deildinni er önnur saga en hann þykir hafa staðið sig vel með liðinu.