Rikki G segir leyndarmálið vera innlifunina

„Ég hef einu sinni farið á skíði – það endaði ekki betur en svo að ég braut á mér fótinn. Þannig að ég hef aldrei farið aftur í fjallið. Hins vegar fannst mér mjög gaman þegar afi minn heitinn var með Eurosport, þá horfðum við oft á íþrótt sem heitir skíðastökk – það var helvíti gaman að horfa á þessa gæja fara á hundrað og tuttugu og fljúga hundruð metra niður, þannig að ég vissi nú af þessu,“ segir Ríkharður Óskar Guðnason eða Rikki G, en hann mun lýsa AK Extreme gámastökkinu annað árið í röð, þrátt fyrir að viðurkenna að vera enginn sérfræðingur í vetraríþróttum.

„Ég var beðinn í fyrra að lýsa einhverju sem heitir AK Ex­treme og ég verð bara að viðurkenna að ég vissi ekkert hvað það var. Ég hélt fyrst að þetta væru bara einhverjir íþróttaleikar – einhver fótbolti, handbolti og svo framvegis – þannig að ég sagði bara já, ekkert mál. Síðan var mér sagt að þetta væri gámastökk og ég hélt að það væri verið að gera grín að mér.

En ég var beðinn að lýsa bara því sem fyrir augu bar og af innlifun eins og ég get gert í fótboltanum. Síðan kem ég þarna og ég dett inn í rosalegt „zone“ – áður en ég vissi af var ég bara farinn að segja „tvöfalt flikk flakk“ og eitthvað. Leyndarmálið er bara að horfa og segja eftir sínu höfði hvað maður heldur að sé að gerast – það er bara ekkert vitlaust. Þetta er náttúrulega bara magnað að fá að taka þátt í þessu.“

Gámastökkið verður sýnt beint á Stöð 2 Sport 2 á laugardaginn klukkan níu í lýsingu Rikka sem mun lifa sig gjörsamlega inn í lýsinguna eins og honum einum er lagið.