Ókeypis fræðslukvöld um þunglyndi

Sálfræðingafélag Íslands stendur fyrir opnum fræðslufyrirlestri á morgun, miðvikudag, kl. 20.30-22 á Hilton Reykjavík Nordica undir heitinu Hvað er með þetta þunglyndi? Fyrirlesturinn er haldinn í tilefni Sálfræðiþings, sem hefst á morgun, og Alþjóða heilbrigðisdagsins.

Þar munu sálfræðingarnir Guðríður Þóra Gísladóttir og Helgi Héðinsson fjalla um helstu einkenni þunglyndis hjá börnum og fullorðnum og kynna árangursríkar leiðir til að ná tökum á því. Einnig gefa þau hagnýt ráð sem geta dregið úr þunglyndi og bætt líðan og leiðbeina um hvert hægt er að leita þegar frekari aðstoðar er þörf.

Í fyrirlestri sínum á morgun ætlar Guðríður Þóra Gísladóttir að fjalla um þunglyndi hjá börnum og unglingum. „Ég mun fjalla um helstu einkenni eftir þroska og aldri, áhættuþætti, hvenær einkenni eru þess eðlis að þörf er á því að leita aðstoðar og þá hvernig aðstandendur geti brugðist við, bæði hvað þeir geta gert sjálfir og hvert er hægt að leita eftir aðstoð.“

Fræðsla skiptir máli

Aðspurð um árangursríkar leiðir til að ná tökum á þunglyndi barna segir hún minna hægt að vinna beint með hugræna þáttinn, áherslan verði alltaf meiri á atferlisþáttinn. „Eftir því sem barnið eldist er hægt að vinna meira með hugræna þáttinn og þá er helst mælt með hugrænni atferlismeðferð. Oft þarf einnig lyf með en þó alltaf í samráði við lækni. Sem forvörn er mikilvægt að skapa umhverfi þar sem barnið og unglingurinn finnur að hann getur tjáð sig og það sé traust í samskiptum. Einnig er mikilvægt að aðstoða barnið, og ekki síður unglinginn, við að halda góðri rútínu í kringum svefn og mataræði og að það sé virkt í íþróttum og tómstundum. Viðvörunarbjöllur ættu að klingja t.d. ef unglingurinn missir skyndilega áhuga á öllum tómstundum, einangrar sig, sefur illa o.s.frv. Þá er mikilvægt að grípa inn í.“

Helgi Héðinsson mun hins vegar fjalla um helstu einkenni þunglyndis hjá fullorðnum og segist ætla að leggja mesta áherslu á hagnýt ráð í baráttunni við þunglyndi. Hann segir ýmsar árangursríkar leiðir fyrir fullorðna til að ná tökum á þunglyndi. „Fyrsta skrefið er að afla sér fræðslu um þunglyndi. Samkvæmt klínískum leiðbeiningum er mælt með hugrænni atferlismeðferð sem fyrsta kosti þar sem sú meðferð hefur sýnt mestan árangur í rannsóknum. Á almennari nótum þá er mikilvægt að fólk sem líður illa opni á líðan sína fyrir einhverjum sem það treystir, hvort sem það er aðstandandi eða fagaðili. Svo þarf að byrja að fikra sig í þá átt að rjúfa vítahring þunglyndis.“

Aukinn áhugi

Hrund Þrándardóttir, formaður stjórnar Sálfræðingafélags Íslands, er fundarstjóri. Þetta er í annað sinn sem félagið stendur fyrir fræðslufyrirlestri í tengslum við árlegt Sálfræðiþing sem nú er verið að halda í níunda sinn. „Ástæða þess að ákveðið var að bjóða upp á svona viðburði tengda þinginu er mjög vaxandi áhugi almennings á sálfræði og geðheilbrigðismálum sem eru ekki lengur sama tabú og áður fyrr. Félagið vill stuðla að enn meiri umræðu um þessi mál í samfélaginu og gefa fólki kost á að njóta góðrar fræðslu fagfólks. Aðgengi fólks að viðeigandi meðferð við mörgum geðsjúkdómum, vegna takmarkaðs aðgengis að sálfræðiþjónustu, er því miður ekki nógu gott þó það fari heldur batnandi. Aukin umræða getur verið liður í að bæta úr því og oft er það að tala um hlutina eða fá fræðslu um þá, fyrsta skrefið varðandi það að leita sér hjálpar.“

Fyrirlesturinn er á morgun, miðvikudag, á Hilton Reykjavík Nordica og stendur yfir frá kl. 20.30-22. Aðgangur er ókeypis og allir velkomnir meðan húsrúm leyfir.